Гонсалу Рамуш мундиалда 32 йиллик натижани такрорлади

Португалия терма жамоаси ҳужумчиси Гонсалу Рамуш ЖЧ—2022 нимчорак финали доирасида Швейцарияга қарши кечган ўйинда (6:1) учта гол ва битта ассист муаллифига айланди.

Рамуш Қатар мундиалидаги илк ҳет-трикни қайд этди. 21 ёшли футболчи ЖЧ плей-оффида ҳет-трикка эришган Томаш Скуҳравидан кейинги дастлабки футболчи бўлди. Чехословакия вакили 1990 йилги мундиал плей-оффида Коста-Рика дарвозасига учта тўп киритганди.

Рамуш Португалия сафида ЖЧлардаги голлари сони бўйича топ-4 ликка кирди. Фақат Эйсебио (9), Криштиану Роналду (8) ва Паулета (4) ундан олдинда.

«Бенфика» форвардига мундиал плей-оффида ҳет-трикка эришиш учун 67 дақиқа кифоя қилди. Ушбу босқичларда 531 дақиқа ҳаракат қилган Роналдуда эса бирорта гол йўқ.