Ижтимоий тармоқларда Маҳаллабай ишлаш ва тадбиркорликни ривожлантириш агентлиги тендерлари шубҳали тарзда ўтказилгани ҳақида турли хабарлар тарқалди. Агентлик ҳолатга муносабат билдирди.
Маълум қилинишича, тадбиркорлик ва ўзини ўзи банд қилиш фаолиятини бошламоқчи бўлган ишсиз, шу жумладан, «темир дафтар», «аёллар дафтари» ва «ёшлар дафтари»га киритилган фуқароларга фаолиятини бошлаш учун керак бўлган асбоб-ускуна, меҳнат қуролларини харид қилиш Ўзбекистон Республикаси Вазирлар Маҳкамасининг 2022 йил 11 майдаги 252-сонли қарорига асосан Электрон давлат харидлари портали орқали амалга оширилиши белгиланган.
Ҳозирда Маҳаллабай ишлаш ва тадбиркорликни ривожлантириш агентлиги мутахассислари томонидан Монополияга қарши курашиш қўмитаси ходимлари билан ҳамкорликда агентликнинг Тошкент шаҳар бошқармаси томонидан ушбу давлат харидларини амалга оширишда «Давлат харидлари тўғрисида»ги қонуни ҳамда юқорида кўрсатилган Вазирлар Маҳкамасининг қарори талабларига риоя этилиши юзасидан ўрганиш ўтказилмоқда.
Шунингдек, Маҳаллабай ишлаш ва тадбиркорликни ривожлантириш агентлигининг ҳудудий бошқармаларида субсидия ҳисобидан амалга оширилаётган давлат харидларини тўғри ўтказиш юзасидан назорат тадбирларини ўтказиш режалаштирилмоқда.
Изоҳ (0)