Путин расмий қароргоҳида зинадан йиқилиб тушгани айтилмоқда
Россия президенти Владимир Путин 30 ноябрь куни расмий қароргоҳида зинадан йиқилиб тушди. Бу ҳақда унинг тансоқчилари билан алоқаси бор Telegram каналига таяниб, Daily Mirror хабар берди.
Ғарб оммавий ахборот воситалари Путиннинг соғлиғи билан боғлиқ муаммолар ҳақида гапириб келмоқда. Кремль Путиннинг ташхисини ошкор қилмаса-да, кўплаб экспертлар президентда ошқозон-ичак тракти онкологияси бор деган фикрда. Путин айнан шу касаллик сабабли кечқурун қароргоҳига қайтганида, зинадан йиқилиб тушгани таъкидланган.
«Россия президенти зинадан тушаётиб, орқаси билан йиқилди. Ундан кейин ёнбошга думалаб, яна бир неча поғона пастга тушди. Ҳодиса президентнинг шахсий қўриқчилари кўз ўнгида содир бўлди, улар зудлик билан Путинга ёрдам берди», — дейилади хабарда.
Уч нафар хавфсизлик ходими Путинни диванга ўтқизган ва қароргоҳдаги навбатчи шифокорларни чақирган.Тез тиббий ёрдам ходимлари бир неча дақиқадан сўнг етиб келган.
«Путин ошқозон-ичак трактининг онкологиясидан азият чекмоқда, бунинг натижасида у аллақачон овқат ҳазм қилиш билан боғлиқ жиддий муаммоларни бошдан кечирган. Йиқилиш натижасида, асосий зарба думғаза соҳасига тушган. Бу, эҳтимол, ўткир оғриқларга олиб келиб, беихтиёр дефекацияни қўзғатди», — дейилади хабарда.
Таъкидланишича, Путинга думғаза жароҳати ва юмшоқ тўқималарнинг шикастланиши ташхиси қўйилган. Воқеа куни Путин оғриқ қолдирувчи дори қабул қилган.
Шу билан бирга, президентнинг нима учун йиқилганини тушуниш учун суриштирув ишларини олиб боришмоқчи.
Маълумот учун, Россия президенти Владимир Путин саратон касаллигига чалингани ҳақидаги миш-мишларни унинг матбуот котиби Дмитрий Песков 1 апрель куни журналистлар билан суҳбатда рад этганди.
«Мен Владимир Путинда саратон касаллиги йўқлигини тўғри тушундимми?», — дея аниқлик киритишни сўраган журналист. Песков эса бунга жавобан «Тўғри», — деган жавоб берган.
