Қашқадарё вилоятининг Шаҳрисабз шаҳрида юпун кийинган ўқувчи қизлар тадбирга жалб қилингани ҳақида хабар берилган эди. Шаҳар ҳокимлиги ҳолат юзасидан муносабат билдирди.
Ҳокимлик матбуот хизматининг маълум қилишича, 30 ноябрь куни Шаҳрисабз шаҳар Ёшлар ишлари агентлиги ва сектор раҳбарлари иштирокида Ёшлар дафтарида турганларга навбатдаги субсидия асосида меҳнат қуролларини ва тўловлар учун сертификатлар топшириш бўйича тадбир бўлиб ўтган.
Тадбир кун тартибида кўзда тутилмаган бўлса-да, 2-сон Болалар мусиқа ва санъат мактаби қошида ташкил этилган ‘Туморча’ рақс тўгараги раҳбари ва ота-оналар томонидан фарзандлари ‘беш ташаббус’ доирасида шаҳар босқичидан биринчи ўринни олиб, вилоят босқичида ҳам 29 ноябрь куни иштирок этиб келишганини билдирган ҳолда танловда яхши баҳоланган рақсларини намойиш этишни ва уларни бу ютуқларини ҳам ташкилотчилар тамонидан эътироф этиш таклифи билан чиққан.
«Шаҳар сектор раҳбарлари томонидан мусобақа ва танловларда яхши ўринларни олган ёшларни тадбирларда эътироф этиб бориш анъана тусига айланиб қолган. Шу сабабли тадбир ташкилотчилари таклифни маъқуллаб, уларга ҳам имконият берган. Улар ота-оналари билан гулхан атрофида бирга иссиқ кийимларда ўтиришган. (Бу ҳолат расм ва видеода ҳам акс этган) Фақатгина даврада ўйнашда ва тақдирлаш жараёнида расмга олиш учун қисқа вақтда рақс кийимида бўлишган холос», — дея ҳолатга аниқлик киритган ҳокимлик.
«Бу ерда ташкилотчиларни оқлашдан йироқмиз, фақат тадбирга рақс тўгараги қизларини устози ва ота-оналар ташаббусига кўра ютуқларини баҳам кўриш учун келишганини англашимиз зарур. Ижтимоий тармоқларда ёш қизларни юпун кийимда тадбирга мажбуран жалб этилганини билдирган ҳолда билиб билмасдан, ҳақоратомуз сўзлар билан муносабат билдирилмоқда», — дейилади хабарда.
Қайд этилишича, тадбирнинг асосий мақсади «Ёшлар дафтари»га рўйхатга олинган ёшларга субсидия ва меҳнат қуролларини топширишдан иборат бўлган. Тадбир 17:30 да бошланиб ёшларнинг хоҳишига кўра гулхан атрофида кўнгилочар дастурга уланиб кетган ва кеч соат 19:30 да тугаган.
«Мазкур ҳолат юзасидан шаҳар ҳокимлигида йиғилиш ўтказилиб, ёшлар тадбирини ташкил этишда эътиборсизлик қилган масъулларга чоралар кўрилди ва камчиликлари кўрсатиб ўтилди. Барчадан узр сўраган ҳолда, жамоатчиликни кескин танқидига олиб келадиган бундай ҳолатларга бошқа йўл қўймаслигимизни маълум қиламиз ва бу тадбир биз учун аччиқ сабоқ бўлди», — дейилади ҳокимлик хабарида.
Халқ таълими вазирлиги мактаб ўқитувчи ва ўқувчилари мактаб вақтидан ташқари, уларнинг саломатлиги ҳамда хавфсизлигига хавф соладиган турли тадбирларга жалб қилмаслик бўйича доимий равишда огоҳлантириб келинаётганига қарамасдан шу каби аянчли ҳолатлар юзага келаётганини билдирганди.
Изоҳ (0)