Аргентина терма жамоаси ҳужумчиси Лионель Месси Мексика терма жамоаси либоси билан боғлиқ гап-сўзларга муносабат билдирди.
ЖЧ—2022 2-туридан ўрин олган Мексикага қарши ўйиндан сўнг (2:0) Аргентина терма жамоаси кийим алмаштириш хонасидаги ҳолат видеотасвирлари ижтимоий тармоқларга жойланди. Унда Месси ерда ётган Мексика терма жамоаси либосига тегиб кетгани акс этган.
Ушбу ҳолат боксчи Сауль Альваресга ёқмаган ва у ижтимоий тармоқдаги саҳифаси орқали Леони танқид қилган. Кейинчалик Гуардадо бу вазиятга муносабат билдириб, Мессининг ёнини олган ва боксчининг ҳаракатини «низо яратиш ва машҳурликка эришишга уриниш»га қиёслаган.
Футболчилар Серхио Агуэро, Сеск Фабрегас, боксчи Майк Тайсон ҳам Мессини қўллаб-қувватлаган. Шундан сўнг Канело Лионель Месси ва Аргентина халқидан узр сўради.
Леонинг ўзи эса вазиятга қуйидагича муносабат билдирди: «Бу англашилмовчилик. Мени таниганлар биладики, ҳеч кимга ҳурматсизлик қилмайман. Бундай ҳолат ўйиндан сўнг кийим алмаштириш хонасига доим юз беради. Ҳеч кимдан узр сўрашим шартмас, чунки мексикаликларга ва терма жамоа либосига нисбатан ҳурматсизлик қилганим йўқ».
Изоҳ (0)