Иқтисодий ўсишнинг глобал секинлашуви ва инфляциянинг ўсиши туфайли 2022 йилнинг биринчи ярмида дунёда реал иш ҳақи 0,9 фоизга камайди. Бу ҳақда БМТ Халқаро меҳнат ташкилотига таяниб «Коммерсантъ» хабар бермоқда.
Халқаро меҳнат ташкилоти таҳлилчиларига кўра, ушбу кўрсаткичнинг пасайиши 20 йил ичида биринчи марта қайд этилди. Бунга сабаб сифатида Украинадаги уруш ва энергетика инқирози билан боғлиқ бўлган вазият кўрсатилмоқда.
Ташкилот ҳисоботига кўра, бутун дунё бўйлаб одамларнинг харид қобилиятини акс эттирувчи реал иш ҳақи энг кўп даромади паст ижтимоий гуруҳларда пасайган.
Бу улар инқироз фонида иш ҳақининг муҳим қисмини нархи энг кўп ўсган асосий товарларга сарфлаши билан изоҳланади.
Ривожланган G20 мамлакатларида 2022 йилнинг биринчи ярмида реал иш ҳақи 2,2 фоизга камайди, ривожланаётган G20 мамлакатларида эса реал иш ҳақи 0,8 фоизга ўсди, — дейилади G20 мамлакатлари учун маълумотлар келтирилган ҳисоботда.
Аввалроқ Ўзбекистонда қайси соҳа вакиллари энг кўп маош олаётгани ҳақида хабар берилганди.
Изоҳ (0)