АҚШ Украина учун NASAMS ҳаво ҳужумига қарши мудофаа тизимини сотиб олиш бўйича Raytheon компанияси билан 1,2 миллиард долларлик шартнома тузди. Бу ҳақда Америка Мудофаа вазирлиги хабар бермоқда.
«Украинага хавфсизлик соҳасида ёрдам бериш бўйича ташаббусларнинг бешинчи пакети доирасида АҚШ армияси Raytheon Missiles and Defense компанияси билан олтита NASAMS батареяларини етказиб бериш, Украина Қуролли кучлари ва хавфсизлик кучларини ўқитиш ва моддий-техник таъминлаш ҳақида 1,2 миллиард долларлик шартнома имзолади», — дейилади баёнотда.
Идора аниқлик киритишича, зенит-ракета мажмуалари ишлаб чиқарилиши якунланиб, Украинага етказиб бериладиган тахминий сана — 2025 йил 28 ноябрь. Аммо Вашингтон ушбу муддатни қисқартириш бўйича ишлар олиб бормоқда, дейилади хабарда.
23 ноябрь куни АҚШ президенти Жо Байден давлат котиби Энтони Блинкенга Украинага 400 миллион доллар ҳарбий кўмак ажратишни таъминлашни топширди. Мамлакат Мудофаа вазирлиги аниқлик критиишича, янги ёрдам пакетига, шу жумладан, NASAMS ракета тизимлари учун қўшимча ўқ-дорилар киради. 4 ноябрь куни Пентагон Украинага саккизта NASAMS мажмуаларини юборганини маълум қилганди.
Аввалроқ АҚШ мудофаа вазири Ллойд Остин АҚШ Украинага 20 миллиард доллардан ортиқ ҳарбий ёрдам кўрсатгани ва қанча вақт керак бўлса, шунча вақт Киевни қўллаб-қувватлашда давом этишини айтганди.
Изоҳ (0)