Тошкентнинг Олмазор туманида хизмат вазифасини бажараётган ИИБ ходими ўлдириб кетилди. Бу ҳақда пойтахт ИИББ матбуот хизмати хабар қилди.
Маълум қилинишича, 30 ноябрь куни соат 00:50 ларда Олмазор тумани ИИО Фаолиятини мувофиқлаштириш бўлими профилактика инспектори катта лейтенант Н.Бобомуротов туманнинг «Ғалаба» маҳалласига тезкор чақирув бўйича етиб бориб, хизмат вазифасини бажараётган вақтида, муқаддам судланган, 1992 йилда туғилган фуқаро Б.З. ходимнинг ҳаётига тажовуз қилиб, воқеа жойидан яширинган.
Ходим воқеа жойида вафот этган. Унинг ҳаётига тажовуз қилишда гумонланаётган шахсни қўлга олиш чоралари кўрилмоқда.
Ҳолат юзасидан Тошкент шаҳар прокуратураси томонидан Жиноят кодексининг 97-моддаси (қасддан одам ўлдириш) билан жиноят иши қўзғатилган.
Хабарда айтилишича, воқеа тафсилотлари тўлиқ ўрганилгандан сўнг, қўшимча маълумот берилади.
Изоҳ (0)