Илон Маскнинг Starlink компанияси Украина аҳолиси учун тарифларни оширди. Тегишли мазмундаги хатни компания абонентларга юбора бошлади, деб хабар беради «Инсайдер УА».
29 декабрдан сунъий йўлдош интернети нархи жисмоний шахслар учун ойига 60 эмас, 70 долларни ташкил қилади.
Starlink терминали ва антеннаси нархи эса 500 дан 700 долларгача ошади.
Starlink тармоғи Украинада уруш бошланганидан кейин кўп ўтмай ишга туширилган эди. Коммуникация инфратузилмаси ўққа тутилиши шароитида у мамлакат мудофаа қобилияти учун муҳим аҳамиятга эга: ундан украиналик ҳарбийлар ҳам фойдаланади. Айни вақтда, компания кўпчилик хизматларни бепул тақдим этмоқда.
SpaceX куз бошида Пентагондан Украинада Starlink’ни молиялаштиришни ўз зиммасига олишни сўраган, Маск харажатларни ойига 20 миллион долларга баҳолаган. Шундан кейин АҚШ президенти маъмурияти иттифоқдошлар билан Украинани сунъий йўлдош алоқаси билан таъминлаш масаласини муҳокама қилаётганини билдирган. Бироқ октябрь ўрталарида бизнесмен Украинада алоқани бепул таъминлашга ваъда берган.
Ноябрь бошида Украинада молиялаштириш билан боғлиқ муаммолар туфайли, 1,3 мингта Starlink терминаллари ишлашдан тўхтагани, бу Украина қуролли кучлари учун «улкан муаммо»га айлангани хабар берилди. Кейинроқ Украина Польша ҳукуматидан Американинг SpaceX компаниясида ишлаб чиқарилган қўшимча 1570 та Starlink сунъий йўлдош терминалларини олгани маълум бўлди.
Мавзуга доир:
Изоҳ (0)