Украинадаги уруш ва сафарбарлик россияликларнинг АҚШга ноқонуний эмиграциясини авж олдириб юборди, бундай катта кўламга америкалик божхоначилар ҳали дуч келмаган эди, деб ёзади The Moscow Times.
Маҳаллий ҳукумат маълумотларига кўра, 2022-молия йили давомида АҚШнинг жанубий чегарасида 21 763 нафар Россия фуқароси қўлга олинган.
Икки йил ичида Россия паспорти билан АҚШнинг Мексика билан чегарасини ноқононий кесиб ўтиш чоғида ушланганлар сони 47 марта ёки 4600 фоизга ошиб кетган. Октябрь ойининг ўзида ноқонуний муҳожирлар билан ишлаш тизимига қарийб 4 минг нафар россиялик келиб тушган. Таққослаш учун, 2020 йилда уларнинг сони жами 467 кишини ташкил қилган.
Америка қонунларида АҚШ ҳудудига келганлар учун бошпана ҳуқуқи кафолатланган бўлса-да, бунинг учун ўз мамлакатида ирқи, миллати, сиёсий қарашлари ёки қайсидир ижтимоий гуруҳга оидлиги бўйича таъқиб қилинаётгани юзасидан далил-исбот талаб этилади.
Ноқонуний муҳожирларнинг кўпчилиги қўлга олинганидан сўнг озод этилади, кейинроқ эса улар бошпана ҳақидаги ариза билан судга мурожаат қилиши мумкин бўлади. Бироқ минглаб одамлар вақтинчалик яшаш марказларига жойлаштирилади, у ерда эса адвокатларни топиш ва далиллар йиғиш қийинроқ бўлади.
Эмиграция бўйича сан-франсисколик адвокат Светлана Кафф россияликларнинг кўпчилиги шундай ҳолатга тушаётганини айтди. «Бошқа мамлакатлардан келган одамлар билан таққослаганда, россияликлар кўпроқ шундай марказларга юборилмоқда», — деди у.
Россия фуқаролари учун АҚШга қонуний йўл билан кетиш деярли имконсиз бўлиб қолган: дипломатлари мамлакатдан чиқариб юборилгач, Америка элчихонаси визалар беришни тўхтатиб қўйди. Консуллик хизматлари Варшавадаги элчихонага кўчирилди, бироқ Польша Россия фуқароларига, ҳатто Шенген визаси соҳибларига ҳам мамлакатга киришни тақиқлаганидан кейин у ҳам имконсиз бўлиб қолди.
Россия Федерал хавфсизлик хизмати маълумотларига кўра, 2022 йилнинг апрель—июнь ойларида бор-йўғи 39 киши Россиядан АҚШга қонуний равишда кетган. Бир йил аввалги кўрсаткич эса тахминан 900 марта каттароқ бўлиб, 36,7 минг кишини ташкил қилган эди.
Эслатиб ўтамиз, 21 сентябрь куни Россияда қисман сафарбарлик эълон қилинганидан кейин, мамлакатни тарк этувчи одамлар сони кескин ўсди. Қуруқликдаги чегараларда катта-катта навбатлар юзага келди, энг яқин визасиз мамлакатларга авиарейслар учун чипталар сотилиб кетди.
Аввалроқ Оқ уй сафарбарликдан қочаётган Россия фуқаролари АҚШда бошпана учун ариза бериши мумкинлигини эълон қилганди.
Изоҳ (0)