Стратегик аҳамиятга эга Херсон шаҳри Россиянинг ўққа тутилиши ва электр таъминотига ҳужум қилиш хавфи остида бўлса ҳам, Украина қўлига қайтди. Аммо томонлар қишки урушга тайёргарлик кўраётганда, иккита алоҳида тўқнашув: бири қуруқликда, иккинчиси ҳавода пайдо бўлади. Бу ҳақда Bloomberg хабар берди.
Нашр маълумотига кўра, ёмғирли куз ва қаттиқ қиш келиши операцияларнинг пасайишига олиб келади. Россия ҳам, Украина ҳам ўз қўшинларини дам олиши ва кучайтириши, шунингдек, жиҳозларни таъмирлаши керак. Тўлиқ жанговар ҳаракатларга қайтиш қишнинг охиригача, ер музлаб қолганда, энг оғир жиҳозлар учун яхши имкониятни тақдим этмайди.
Россиянинг урушдаги бўшлиқни тўлдириши қийин бўлади. 200 дан 300 минггача ёшлар ҳарбий хизматга чақирилиш таҳдиди остида Россиядан қочиб, чегарадош давлатларга бошпана излаб кетган. Россия президенти Владимир Путин жиноятчилар, уйсизлар ва мастларни ҳарбий хизматга чақириш йўлига ўтган, дея хабар беради Bloomberg.
Украина ҳам қийинчиликларга дуч келмоқда ва бу аҳоли билан боғлиқ, жумладан, мамлакат Россия аҳолисининг атиги учдан бир қисмини ташкил қилади.
Қишда Украина таъминотда ҳам сезиларли устунликка эга бўлади. Ғарб нафақат юқори технологияли қуролларни, балки пиёда қўшинлар учун қурол, миномёт, ўқ-дорилар, ёқилғи, юк машиналари, кўчма печкалар, алоқа учун ускуналар етказиб беради. Bloomberg‘га кўра, бундан фарқли ўлароқ, россиялик ҳарбий хизматчиларга ухлаш учун керакли жиҳозлар топиш ва тампонлардан қўшимча бандажлар тикиш буюрилган.
Аммо қуруқликдаги урушда устунлик мудофаа томонига тушади. Ҳарбий назарияга кўра, яхши қазилган ҳимояни забт этиш учун ҳужумда 3:1 устунлик керак.
Аммо ҳаво ҳудудида кечадиган уруш ҳақида нима дейиш мумкин?
Украина устидаги ҳаво урушида устунлик Россияга тегишли. Биринчи навбатда, улар Сурияда катта жанговар тажрибага эга бўлган анча катта ҳаво кучларига эга. Украинадаги урушга раҳбарлик қилиш учун тайинланган янги генерал Россия ҳарбий-ҳаво кучлари қўмондони, Суриядаги «ваҳшийликлари» билан танилган шахс. Стратегия оддий: аҳолининг руҳиятини бузиш учун Украинанинг электр ва сув тизимларига зарба бериш, уларни яшаш учун яроқсиз бўлган уйларини том маънода музлатиш.
Путиннинг аниқ бошқариладиган ракета захиралари тезда тугаб бораётган бўлса-да (масалан, у юқори технологияли қуроллар учун Эронга мурожаат қилган), унинг Совуқ урушдан бери ўнлаб йиллар давомида тўпланиб қолган кўплаб бомбалари бор.
«У фуқароларнинг ўлими ҳақида қайғурмагани учун осмондан имкон қадар кўпроқ зарба бериб, ўлдиришга ҳаракат қилади», дейди Bloomberg.
Нашрнинг таъкидлашича, бундай шароитда Ғарб Украинанинг ҳаво мудофаасини қўллаб-қувватлашни кучайтириши керак. Украина президенти Владимир Зеленский, бир неча бор ҳаво ҳудудини ёпишни сўраган. Катта эҳтимол билан, НАТО «Темир гумбаз» (АҚШ ва Исроил томонидан биргаликда ишлаб чиқилган), НАТО Patriotи каби юқори даражадаги ҳаво-ер мудофаа ракета тизимларини беради.
НАТО Украинани Совет давридаги МиГ-29 қирувчилари ёки Американинг F-16 самолётлари билан таъминлашни ҳам кўриб чиқмоқда. Bloomberg хулосасига кўра, бундай чораларсиз ҳаво уруши Путин фойдасига давом этади.
Изоҳ (0)