Ўтган ўн ой ичида содир этилган ЙТҲларда 1931 киши ҳалок бўлган — Сенат
Ўзбекистонда январь—октябрь ойларида 7 минг 636 та йўл-транспорт ҳодисаси содир этилган. Бу ҳақда Сенатда бўлиб ўтган автомобиль йўлларида хавфсизликни таъминлашга оид йиғилишда сенатор Қутбиддин Бурхонов маълум қилди, дея хабар бермоқда «Дарё» мухбири.
Қутбиддин Бурхоновнинг айтишича, кўрилаётган чораларга қарамай, ўлимга олиб келган ЙТҲлар сони юқорилигича қолмоқда:
Жумладан, 2022 йилнинг ўтган ўн ойида 7 минг 636та ЙТҲ содир этилиб, уларда 7 минг 174 нафар фуқаро жароҳатланган ва 1 минг 931 нафар фуқаро ҳалок бўлган. Энг ачинарлиси, ҳалок бўлганларнинг 226 нафари ёш болалардир. Бу ҳолат барчамизда бирдек ташвиш уйғотади. Биз 200 дан зиёд боланинг ўлими ҳақида гапиряпмиз, ваҳоланки, бир нафар боланинг ҳам тинч замонда бу тарзда ҳалок бўлиши фожиадир. Шу боис йўлларда хавфсизликни таъминлаш масаласи ҳеч қачон кун тартибидан тушмайди ва, табиийки, Сенатнинг Мудофаа ва хавфсизлик масалалари қўмитасининг доимий назоратида бўлади.Мажлисда «Автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш чора-тадбирлари тўғрисида»ги президент қарори ижросида камчиликлар мавжудлиги таъкидланди.
«Қарорда белгиланган вазифалар доирасида «Узавтомотобелги» ДУКда йўл ҳаракатини ташкил этишнинг техник воситаларини ишлаб чиқаришни йўлга қўйиш ва ушбу соҳада рақобат муҳитини шакллантириш бўйича етарли ишлар амалга оширилмаган. Ишлаб чиқарилаётган йўл белгилари ва йўл чизиқларининг сифати бугунги кун талабига мутлақо жавоб бермаяпти. Оқибатда, бир йилга қолмай, йўл белгилари яроқсиз ҳолга келиб қолмоқда.
Қарорнинг 9-бандида ҳудудий махсус комиссиялар ҳар ойда йўлларнинг ҳолати ва мавжуд инфратузилма, «авария» ўчоқлари, қоидабузарликларнинг таҳлилидан келиб чиқиб, ҳаракат хавфсизлиги, транспорт ва йўл соҳаларига масъул идоралар раҳбарлари фаолиятини танқидий ўрганиши, Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар кенгашларига муҳокама қилиш учун киритиши ва натижалари бўйича республика махсус комиссиясига ҳисобот тақдим этиш белгиланган. Бироқ, ҳудудларда бу вазифа ижроси ҳам лозим даражада таъминланмаган», — деди Қутбиддин Бурхонов.
Аввалроқ Андижонда Isuzu ва юк машинаси тўқнашиши оқибатида 41 киши жароҳатланди, 3 нафари воқеа жойида ҳалок бўлгани хабар қилинганди.
