Агар НАТО Украинани Patriot комплекслари билан таъминлай бошласа, улар Россия армиясининг қонуний нишонига айланади. Бу ҳақда Россия Хавфсизлик кенгаши раиси ўринбосари Дмитрий Медведев Telegram каналида маълум қилди.
«Агар НАТО бош котиби Йенс Столтенберг шаъма қилганидек, альянс Украинани Patriot комплекслари билан таъминласа, улар Қуролли кучларимизнинг нишонига айланади», — деди Медведев.
НАТО бош котиби Йенс Столтенберг альянс мамлакатлари ташқи ишлар вазирларининг Бухарестдаги йиғилиши якунларига кўра, Киевга Patriot ҳаво ҳужумидан мудофаа тизимларини етказишни муҳокама қилган. Медведевнинг таҳдиди фонида Пентагон АҚШ ўз комплексларини Киевга етказиб беришни режалаштирмаётганини таъкидлади.
Шу билан бирга, Пентагон қўшимча Hawk ҳаво мудофаа тизимлари Украинага юборилаётгани ҳақида маълумот берди.
Маълумот ўрнида, Руминияда бўлиб ўтаётган НАТО саммитида альянс бош котиби Йенс Столтенберг урушда Россия президенти Владимир Путиннинг ғалаба қозонишига йўл қўйиб бўлмаслигини айтди. У альянс Украинадаги можарода иштирок этмайди, бироқ НАТО Киевга Россиядан ўзини ҳимоя қила олиши учун ёрдам беришини қўшимча қилди.
«Биз Путиннинг ғалаба қозонишига йўл қўя олмаймиз, акс ҳолда бу бошқа авторитар раҳбарларга яшил чироқни билдиради. Уларга ҳарбий куч орқали ўз мақсадларига эришиш мумкинлигини кўрсатади. Бу дунёдаги вазиятни янада хавфлироқ қилади. Шунинг учун Украинани қўллаб-қувватлаш бизнинг умумий хавфсизлик манфаатларимиз учундир», — деди Столтенберг.
У Россияни урушда шафқатсизликни кучайтираётганликда айблаб, унинг Европа ва дунёнинг бошқа мамлакатларига юклаган молиявий юкини эслатиб ўтди.
Изоҳ (0)