Ўзбекистонда 10 ойда 3,5 минг тонна озиқ-овқат маҳсулоти истеъмолга яроқсиз деб топилди

АОКАда ўтказилган матбуот анжуманида Озиқ-овқат сифатини таъминлаш йўналишида амалга оширилаётган ишлар таҳлил қилинди.

Қайд этилишича, 10 ой давомида норматив ҳужжатлар талабларига жавоб бермаган 3540,8 тонна ва 4623 литр озиқ-овқат маҳсулотлари истеъмолга яроқсиз деб топилган. Жаҳон соғлиқни сақлаш ташкилоти билан биргаликда Ўзбекистоннинг 18—64 ёшдаги аҳолиси ўртасида ўтказилган тадқиқот натижаларининг кўрсатишича:

• ҳар куни аҳолининг учдан икки қисми (67 фоиз) етарли миқдорда (400 граммдан кам) сабзавот ва мевалар истеъмол қилади;
• аҳолининг ярми — оғир вазнли, 20 фоизи — семиз;
• 46 фоизининг қонида холестерин миқдори ошган;
• аҳолининг ўртача туз истеъмоли — кунига 14,9 граммни ташкил этади, бу — ЖССТ томонидан тавсия этилган миқдордан 3 баравар кўп (кунига 5 граммдан ошмаслиги лозим).

Шу боис соғлом ва хавфсиз овқатланишни ташкил қилиш борасида истеъмолчиларнинг саводхонлигини ошириш ишлари олиб борилмоқда.

Аҳоли орасида юқумли ошқозон-ичак касалликлари ва гуруҳли овқатдан захарланиш ҳолатларининг олдини олиш борасида ҳудудларга 1007 нафар мутахассис бириктирилган. Ишчи гуруҳлар 1150 та рейд ўтказган. 149 маротаба бозорларда, 375 та умумий овқатланиш корхоналарида, 597 та савдо дўконларида ва 142 та озиқ-овқат ишлаб чиқариш корхоналарида ўрганишлар ўтказилган.

Аниқланган камчилар юзасидан 228 нафар фуқарога нисбатан маъмурий чоралар қўлланилган. Сифатсиз деб топилган 36 475 кг яроқсиз озиқ-овқат маҳсулотларининг савдоси тақиқланган.