Мексика президенти Андрес Мануэль Лопес Обрадор пойтахтда оммавий «халқ юриши»ни олиб борди. Бу ҳақда Deutsche Welle хабар берди.
Президент матбуот котиби Хесус Рамиреснинг айтишича, митингда камида 1,2 миллион киши қатнашган. Мутахассисларнинг фикрича, бу 40 йил ичида Мексика президенти бошчилигидаги биринчи марш ҳисобланади.
«Мексика энди олигархия томонидан бошқарилмайди, эндиликда у камбағалларга устунлик берадиган демократик тизимдир», — деди Лопес Обрадор.
Президент марши 2024 йилга мўлжалланган навбатдаги умумий сайловлар олдидан бўлиб ўтмоқда. Мексика президентларини сайлаш бир маротаба олти йиллик муддат билан чекланган, яъни Обрадор яна ўз номзодини қўя олмайди.
Шаҳар мери ва президентнинг энг яқин сафдошларидан бири Клаудия Шейнбаум маршда бир миллиондан ортиқ одам қатнашганини айтган.
«Бу президент Лопес Обрадор билан тарихий марш бўлди. Ҳеч қандай кўнгилсиз воқеа юз бермади, ҳаттоки бир стакан сингани ҳам йўқ. Жамоат хавфсизлиги бошқармаси маршда 1,2 миллион киши иштирок этганини маълум қилди», — дейди Шейнбаум.
Изоҳ (0)