Киев мэри шаҳарда электр ўчиши баҳоргача давом этиши мумкинлигидан огоҳлантирди

Киевда электр узилишлари баҳоргача давом этиши мумкин. Бу ҳақда шаҳар мэри Виталий Кличко «РБК-Украина»га берган интервьюсида маълум қилди.

«Биз ҳамма нарсани имкон қадар тезроқ тиклашга, кутилмаган ҳодисалар бўлмаслиги учун аниқ жадвалларга ўтишга ва шундан кейин узлуксиз электр таъминотига ўтишга ҳаракат қиляпмиз. Аммо узилишлар баҳоргача давом этиши мумкинлигига тайёр туришимиз керак», — деди Кличко.

Шаҳар мери, шунингдек, Киев аҳолиси шаҳар четига кўчирилиши эҳтимоли ҳақидаги гапларга ҳам изоҳ берди. У аҳолини озиқ-овқат ва сув захирасини тўплашга чақирди.

Биз турли сценарийларга, жумладан, ёмонларига ҳам тайёр бўлишимиз керак. Тўлиқ эвакуация бўлмайди, балки қисман амалга оширилар, лекин уни эвакуация деб бўлмайди. Буни муайян тоифадаги одамларнинг вақтинчалик шаҳар атрофига кўчирилиши дейиш мумкин.

Киевнинг ҳар бир фуқаросидан турли сценарийларни ҳисобга олишни ва уларга тайёр туришни сўрайман. Илтимос, уйда техника ва ичимлик суви, электр энергиясисиз пишириш ёки истеъмол қилиш мумкин бўлган озиқ-овқат маҳсулотлари, иссиқ кийимлар тайёрлаб қўйинг, ноутбук ва повербанкларни зарядга тўлдиринг, телефонингизга офлайн карталар юклаб олинг.

Мабодо ёмон сценарий юз берган тақдирда, ҳамма шаҳар четидаги сув, печкаси бор уйига ёки дўстлариникига бора олса яхши бўларди. Аммо биз энг ёмон ҳолат содир бўлмаслиги учун қўлимиздан келганини қиляпмиз, — деди Киев мери.

Украина ҳукумати «бузилмас пунктлар» — иссиқлик ва электр энергияси билан узлуксиз таъминланадиган жойларни ташкил қилди. 25 ноябрь куни Украина президенти Владимир Зеленский бундай пунктлар ёмон жойлаштирилгани учун Киев расмийларини танқид қилди.