Килиан Мбаппе Франция терма жамоасида Зиданга етиб олди, мундиалдаги голлар бўйича Анрини ортда қолдирди

Франция терма жамоаси ҳужумчиси Килиан Мбаппе ЖЧ—2022 2-тури доирасида Данияга қарши кечган баҳсда (2:1) дубль муаллифига айланди.

23 ёшли футболчи Жаҳон Чемпионатларидаги 6 ва 7-голини урган ҳолда, Зинедин Зидан (5) ва Тьерри Анрини (6) ортда қолдирди. Франция футболчиларидан фақат Жюст Фонтен (13) ундан олдинда.

Айни вақтда тўп сураётган футболчилардан фақат Томас Мюллер (10), Криштиану Роналду (8) ва Лионель Месси (8) бу борада Килианни ортда қолдиряпти. Рекордчи Мирослав Клозе ҳисобида эса 16 та гол мавжуд.

Мбаппе Франция терма жамоасидаги голлари сонини 31 тага етказди ва бу борада Зинедин Зиданга етиб олди. Мбаппе тўпурарлар рўйхатида Давид Трезеге (34), Карим Бензема (37), Мишел Платини (41), Антуан Гризманн (42), Тьерри Анри ва Оливье Жирудан (51) ортда.

Килиан клуб ва терма жамоа сафида 2022 йилги голлари сонини 50 тага етказди. 2021 йилда ҳам футболчи 50+ голлик довондан ўтганди.

Мавзуга доир: Франция амалдаги жаҳон чемпионларининг нохуш сериясига якун ясади