Қосим-Жўмарт Тўқаев қасамёд қабул қилди ва президент лавозимига киришди

Қосим-Жўмарт Тўқаев Остонада бўлиб ўтган инаугурация маросимида қасамёд қабул қилди ва президент лавозимига киришди, дея хабар бермоқда «ТАСС».

20 ноябрь куни Қозоғистон президентлигига навбатдан ташқари сайловларда ғолиб бўлган Қосим-Жўмарт Тўқаев мамлакат халқига қасамёд қабул қилди ва давлат раҳбари лавозимига расман киришди.

26 ноябрь куни эрталаб бўлиб ўтган инаугурация маросимида Тўқаев Қозоғистонда президент сайловлари адолатли ва очиқчасига бўлиб ўтганини айтди. Етти йил муддатли бир марталик президентликка ўтиш эса сиёсатчиларнинг янги авлодига йўл очиб беради, деди у.

Тўқаев қайта сайланганидан кейинги биринчи сафарини Россияга уюштириши кутилмоқда. 28 ноябрь, душанба куни у Москвага бориб, Путин билан музокаралар ўтказади ва ҳужжатлар имзолайди, дейилади «РИА Новости» хабарида.

Эслатиб ўтамиз, Қозоғистонда 20 ноябрь куни бўлиб ўтган президент сайловининг якуний натижаларига кўра, сайловчиларнинг 69,44 фоизи, яъни 8 300 046 киши овоз берган бўлиб, шуларнинг 6 456 492 нафари ёки 81,31 фоизи Қосим-Жўмарт Тўқаевни сайлаган.