Европа Иттифоқи Марказий Осиёга Россия ва Хитойдан кўра кўпроқ сармоя киритади. Бу ҳақда Европа дипломатияси раҳбари Хосеп Борреллга таяниб, «Коммерсантъ» хабар бермоқда.
Шубҳасиз, биз Марказий Осиёдаги энг йирик инвестормиз. Охирги 10 йил ичида Европа Иттифоқига аъзо давлатлар Марказий Осиё давлатларига 105 миллиард евродан ортиқ сармоя киритди, — деди Хосеп Боррелл.
Унга кўра, бу минтақадаги тўғридан-тўғри хорижий инвестициялар умумий ҳажмининг 40 фоизидан ошиб кетди. Бу Россия ва Хитой сармоя киритаётганидан ҳам кўп.
Шунингдек, у бундан ҳам кўпроқ нарса қилишга тайёр эканликларини билдирди.
Европа дипломатияси раҳбари Хосеп Боррелл Самарқандда Европа Иттифоқи ва Марказий Осиёнинг ўзаро боғлиқлигига бағишланган халқаро анжуманда иштирок этди.
Дипломатга кўра, Европа Иттифоқи ҳам Марказий Осиёдаги ҳамкорлари каби «стратегик мухторият» сари интилмоқда.
Ҳаддан ташқари қарамлик ва танловнинг етишмаслиги жуда қимматга тушади. Бугун эса Европада биз энергия хавфсизлиги, шунингдек, бошқа муҳим соҳалар: рақамли инфратузилма, хавфсизлик архитектураси, шунингдек, озиқ-овқат таъминоти ва энг муҳим хом ашёдан фойдаланиш ҳақида гап кетганда буни жуда яққол кўряпмиз, — дея қўшимча қилди Боррелл.
Конференцияда у, шунингдек, Европа Иттифоқининг минтақа давлатлари билан сув, энергетика, иқлим ўзгариши ва рақамли уланиш бўйича ҳамкорлиги ташаббусларини тақдим этди. Бу эса Марказий Осиёнинг сунъий йўлдош алоқалари орқали глобал интернет тармоғига киришини оширади.
Аввалроқ Ўзбекистон Марказий Осиёдаги қайси давлатлар билан энг кўп савдо қилаётгани маълум бўлгани ҳақида хабар берилганди.
Изоҳ (0)