Польша Украинага ҳарбий кўмак беришда давом этади, ракета қулаб тушиши билан боғлиқ вазият республика ҳукуматининг позициясини ўзгартирмайди. Бу ҳақда Польшанинг БМТдаги вакили Кшиштоф Шчерский Хавфсизлик кенгаши мажлисида айтиб ўтди, деб ёзади «РБК».
«Жорий вазият бизнинг ёндашувимизни ўзгартирмайди. Польша Украинани қўллаб-қувватлашни давом эттириш зарур деб ҳисоблайди. Польша буни жанговар ҳаракатларнинг энг бошидан буён амалга ошириб келмоқда», — деди Шчерский.
15 ноябрь куни Польша ОАВлари Украина билан чегара яқинидаги Люблинск вилоятининг Пшеводув қишлоғига иккита ракета қулагани ҳақида хабар берди. Ракеталардан бири элеваторга келиб тушди, оқибатда икки киши ҳалок бўлди. Шу куни Россия Украина ҳудудига ёппасига ракета зарбаси берганди.
Украина ҳукумати Польшадаги ҳодисада Россияни жавобгар қилди. Москва айбловларни рад этмоқда. Ғарб мамлакатлари ва Польша ҳукумати ракета Украинага тегишли бўлгани ҳақидаги версияга мойиллик билдирмоқда. Польша президенти Анжей Дуда «бахтсиз ҳодиса» юз берганини тахмин қилди. Унинг сўзларига кўра, катта эҳтимол билан, қулаган ракета Украина ҳаво ҳужумига қарши мудофааси томонидан қўлланилган.
АҚШ, Германия ва Буюк Британия ҳам Польша ракета қулаши билан боғлиқ ҳодиса учун якунда Украина билан уруш бошлаган ва мамлакат фуқаролик инфратузилмасини ўққа тутган Россия масъул эканлиги ҳақидаги баёнотлар билан чиқди.
Изоҳ (0)