Бугун, 17 ноябрь куни Ўзбекистон президентининг «Истеъмол бозорларида нархлар барқарорлигини таъминлашга доир қўшимча чора-тадбирлар тўғрисида»ги фармони қабул қилинди.
Таъкидланишича, фармондан асосий мақсад аҳолини ижтимоий аҳамиятга эга маҳсулотлар билан таъминлаш ҳамда ички бозорда озиқ-овқат маҳсулотлари нархи ошиб кетишининг олдини олишдир.
Фармонга кўра, 2022 йил 1 июндаги белгиланган бир қанча имтиёзлар 2023 йил 1 январдан 2023 йил 1 июлга қадар узайтирилади.
Имтиёзлар орасида 23 турдаги бирламчи озиқ-овқат маҳсулотлари учун импорт божхона божининг нол ставкаларини қўллаш, савдо-иқтисодий муносабатларда айрим мамлакатлардан импорт қилинадиган озиқ-овқат маҳсулотларига божхона божининг икки баравар ставкасини қўлламаслик бор.
23 турдаги импорт божи бекор қилинган бирламчи озиқ-овқат маҳсулотлари қуйидагилардан иборат:
- гўшт маҳсулотлари;
- балиқ;
- сут маҳсулотлари;
- тухум;
- мевалар;
- цитрус мевалар;
- ўсимлик ёғи;
- буғдой уни ва бошқа озиқ-овқат маҳсулотлари.
Қайд этилишича, 2022 йил 1 июндаги фармон ортидан айрим озиқ-овқат маҳсулотларининг кескин ошиб кетишининг олди олинган.
Жумладан:
- мол гўшти (64,7 минг сўмдан 67,5 минг сўмга) 4 фоизга (ўтган йилнинг шу даврида 11 фоизга ошган);
- қўй гўшти (67,4 минг сўмдан 71 минг сўмга) 5 фоизга (ўтган йилнинг шу даврида 9 фоизга ошган);
- товуқ гўшти (25,1 минг сўмдан 25,6 минг сўмга) 2 фоизга (ўтган йилнинг шу даврида 14 фоизга ошган);
- кунгабоқар ёғи (19,4 минг сўмдан 21,2 минг сўмга)
- 9 фоизга (ўтган йилнинг шу даврида 32 фоизга ошган) ошган.
Изоҳ (0)