«Етарлича идеал эмас»: ташқи кўриниши туфайли кастингдан ўтолмаган машҳурлар (фото)

Омадсизликлар ҳатто энг истеъдодли ва гўзал одамларда ҳам бўлади, чунки инсон омили баъзида катта рол ўйнайди, аммо бу таслим бўлиш учун сабаб эмас. Мових онлайн-платформаси мутахассислари бир пайтлар ташқи кўриниши туфайли кастингдан ўтолмаган, аммо таслим бўлмаган ва охир-оқибат ўзлари хоҳлаган чўққига эришган севимли актёрлар ҳақида маълумот беради.

Мерил Стрип

Ишониш қийин бўлса-да, аммо бир пайтлар Мерил Стрипни кинога олишмаган, чунки продюсернинг сўзларига кўра, у гўзал эмас эди. 1975 йилда бўлажак юлдуз фильмларда эндигина рол ўйнай бошлаганида «Кинг Конг» фильми кастингида иштирок этади — у Конг севиб қолган актриса Дуэйн ролини ўйнайди.

Кейинчалик Мерил Стрипнинг эслашича, продюсер Дино ди Лаурентис ёш актрисани кўриб, ўғлига итальян тилида: «Нега бу тасқарани олиб келдинг?», дейди. Албатта, ди Лаурентис Мерил итальянчани мукаммал тушунишини билмас эди. Кўз ёш тўкиш ўрнига қиз хотиржамлик билан продюсерга итальян тилида: «Кинг Конгда ўйнаш учун гўзал эмаслигимдан жуда афсусдаман», — деб жавоб беради.

Кейинчалик Жессика Ленг Дуэйн ролига тасдиқланади. Фильм ўз даврининг хитига айланди, кассада 52 миллион доллар йиғди ва «Оскар»га номзод бўлди. Тўрт йил ўтгач, Мерил Стрип «Кийик овчиси» фильмидаги Линда роли учун биринчи «Оскар» мукофотини олди (1979). Бир йил ўтгач эса «Крамер Крамерга қарши» драмасидаги роли учун яна бир номинацияни қўлга киритди.

Генри Кевилл

Хушбичим супермен ва «Жодугар» фильми юлдузи Генри Кевилл бир вақтлар орзу қилган ролига тасдиқланмаган, чунки режиссёрлар актёрни яхши формада эмас деб ҳисоблашган. Ўшанда 23 ёшли Кевилл «Казино Royal» фильмидаги Жеймс Бонд роли учун кастингда қатнашганди.

Актёрнинг эслашича, ундан Шон Коннери фильмидаги душдан сочиққа ўранган ҳолда чиқиш саҳнасини такрорлашни сўрашган. Шунда режиссёр Мартин Кемпбелл шундай дейди: «Генри, сен жуда семиз кўринаркансан».

«Ўшанда мен қандай машқ қилишни, қандай диета қилишни билмасдим. Мартин буни айтганидан хурсандман, чунки мен ҳақиқатни қадрлайман. Бу янада яхши бўлишимга ёрдам беради», — деб эслайди кейинроқ Генри Кевилл.

Кемпбеллнинг айтишича, аслида бу рол Кевилл 007 агенти учун жуда ёш ва тажрибасиз бўлганлиги учунгина Дэниэл Крейг фойдасига ҳал бўлган.

Мел Гибсон

Голливуднинг яна бир севимли актёри ҳам Жеймс Бонд ролига даъвогар бўлган — Мел Гибсон 007 бўлишга ҳаракат қилади, аммо ташқи кўриниши туфайли уни қабул қилишмайди. Бунга сабаб актёрнинг бўйи эди. Бир қатор фильмлар продюсери Алберт Брокколи ўша пайтда аллақачон машҳур актёрни «кичик бўйи» туфайли рад этган. Мел Гибсоннинг бўйи 175 см, Жеймс Бонд эса баландроқ бўлиши керак эди. Мисол учун, Пирс Броснан - 186 см, Шон Коннери - 188 см, Даниэль Крейг - 178 см бўлган.

Кейинчалик Мел Гибсон Жеймс Бонд ролига рад этилмагани, шунчаки ўзи бу ролдан воз кечганини маълум қилган.

Райан Гослинг

Райан Гослинг «Севимли суяклар» фильмида бош рол — маняк томонидан ўлдирилган қизнинг отасини ўйнаши керак эди. Гослинг кастингдан ўтади ва тасдиқланади, аммо суратга олиш бошланишидан бир кун олдин актёр Марк Уолберг билан алмаштирилади. Кейин бу ҳолат тўсатдан бўлган ижодий қарашлар сифатида тушунтирилади.

Кейинчалик маълум бўладики, Райан Гослинг қаҳрамонини соқолли одам сифатида тасаввур қилган. Актёр ролга мослашаётган бир пайтда 30 килога семириб, соқол ўстиришга қарор қилади.

Режиссёр Питер Жексон образни бундай тушунишидан ҳайратда қолади ва Гослингни фильмдан четлаштиради.