Тайинловига ҳали бир ой ҳам тўлмаган Андижон ССБ бошлиғи ишдан бўшаш учун ариза ёзди
Андижонлик тадбиркор 18 октябрь куни вилоят соғлиқни сақлаш бошқармаси бошлиғи этиб тайинлангани, жамоатчилик эса Андижон ҳокими ва вазир можаросига сабаб бўлган фармкомпания раҳбари вилоят ССБга бошлиқ бўлганини муҳокама қилгани ҳақида хабарлар берилган эди. Вилоят ҳокимлиги ахборот хизматининг маълум қилишича, тайинловига ҳали бир ой ҳам тўлмаган Журъатбек Қувватов лавозимидан озод қилинишини сўраб, ариза ёзган.
Таъкидланишича, 2022 йил 8 августда «Давлат фуқаролик хизмати тўғрисида»ги қонун қабул қилинган бўлиб, ушбу қонун 10 ноябрь кунидан кучга кирган. Мазкур қонуннинг 13-моддасига кўра, давлат фуқаролик хизматчисига тадбиркорлик фаолияти билан шуғулланишга, тадбиркорлик фаолияти субъектларини ташкил этишга, уларнинг муассиси (иштирокчиси) бўлишга, тадбиркорлик фаолияти субъектида ташкилий бошқарув, маъмурий хўжалик вазифаларини бажаришга чекловлар қўйилган.
Андижон вилояти соғлиқни сақлаш бошқармаси бошлиғи лавозимига тайинланган Журъатбек Қувватов тадбиркорлик фаолияти билан шуғулланади.
Юқоридаги қонун кучга кириши муносабати билан қонуннинг 19-моддасида таъкидланган манфаатлар тўқнашувининг олдини олиш, тадбиркорлик фаолиятини давом эттириш мақсадида Ж.Қувватов эгаллаб турган лавозимидан озод қилинишини сўраб ариза билан мурожаат қилган.
