Ижтимоий тармоқларда Тошкент тиббиёт академияси ўқитувчилари маҳаллаларга бириктирилган ҳолда, хонадонма-хонадон юриб, аҳолига тиббий хизмат кўрсатаётгани ҳақида хабарлар тарқалди.
«Аҳмоқлик, ўқитувчилар тиббиёт академияси талабларини ўқитиш ўрнига, уларни маҳаллаларга бириктиришмоқда. Тўғриси, одам чарчаб кетди», деган ўз исмини ошкор қилмаган ўқитувчи.
Ҳолат юзасидан Тошкент тиббиёт академияси проректори Турдиқул Бобомуратов «Дарё»га изоҳ берди. Масъулнинг айтишича, ушбу хабарлар ҳақиқатга тўғри келмайди.
«Кўриниб турибдики, у рўйхат бундан 3—4 йил олдинги маълумот бўлиб, ушбу рўйхатда ҳатто бундан 2 йил муқаддам вафот этган, Тиббий ва биологик кимё кафедраси мудири фамилияси ҳам кўрсатилган. Қолаверса, олдин ҳам маҳаллага дарс ва иш вақтида ўқитувчи юборилмаган», деди Турдиқул Бобомуратов.
Аввалроқ Масс-медиа фонди Васийлик кенгаши раиси ўринбосари Саида Мирзиёева ўқитувчиларни хонадонларни айланиб чиқишга ва ўқувчилар рўйхатини тузишга мажбур қилишаётгани юзасидан фикр билдирган эди.
«Мен ўқитувчиларга бўлган муносабатни қайта кўриб чиқиш ўта зарур деб ҳисоблайман ва мутасаддилардан уларнинг зиммасига кераксиз ва ноқонуний вазифалар юклашни бас қилишларини сўраб қоламан», — деган Саида Мирзиёева.
Изоҳ (0)