«Хитой хавфсизлиги масаласи ноаниқ қолмоқда». Си Цзиньпин Хитой армиясини урушга тайёрлаш кучайтирилишини эълон қилди

Хитой хавфсизлиги масаласи тобора беқарор ва ноаниқ бўлиб бормоқда, деди мамлакат раҳбари Си Цзиньпин. Унинг айтишича, Хитой ўзининг ҳарбий шайлиги ва ҳар қандай урушга тайёргарлигини кучайтиради.

«Хитой ҳарбий шайлик ва ҳар қандай урушга тайёргарликни ҳар томонлама кучайтиради», — дея Си Цзиньпиннинг сўзларини келтирди Reuters.

У шунингдек, Хитой Халқ озодлик армияси қўмондонлиги қўшинлар орасида инновацияларни амалга ошириши ва Хитой кучларининг зиддиятларга самарали рўпара туриши учун ишончли механизмларни шакллантириши кераклигини таъкидлади.

«Дунёда даврлар ўзгариши тобора жадал кечмоқда. Шу муносабат билан Хитой хавфсизлигига таъсир этувчи ноаниқлик ва беқарорлаштирувчи омиллар кучаймоқда. Биз ватанимизнинг миллий суверенитети, хавфсизлиги ва тараққиёт манфаатларини қатъий ҳимоя қилишимиз зарур», — деб қўшимча қилди  Си Цзиньпин.

Октябрь ойи бошида Тайван ўзининг ҳаво ҳужумидан мудофаа зонасига Хитой ҳарбий-ҳаво кучлари кенг кўламда киргани ҳақида хабар берганди. Шу фонда Си Цзиньпин Тайван билан тинч йўл орқали «бирлашиш»га ваъда берган.

Ўз навбатида АҚШ президенти Жо Байден Пекин агрессияси юз берган тақдирда, Тайванга ёрдам беришни ваъда қилган ва оролда ҳарбий заҳира тайёрлашни бошлаган.