ДХХ Жиззах вилояти бошқармаси ҳамда вилоят прокуратураси ходимлари томонидан ўтказилган тезкор тадбирда Шароф Рашидов туманида ҳоким ёрдамчиси 2000 доллар пора олаётганида қўлга олинди. Бу ҳақда «Дарё» мухбири хабар бермоқда.
Таъкидланишича, Шароф Рашидов тумани, «Оқтош ота» маҳалла фуқаролар йиғинида ҳоким ёрдамчиси лавозимида ишлаб келган А.М. ўзининг хизмат мавқейидан фойдаланиб, ҳудуддаги тадбиркорлардан бирининг ишончига кириб, фуқароларга қурилаётган 10 та иссиқхонанинг қурилиши битказилмаганини била туриб, мазкур иссиқхоналар учун жами 330 миллион сўм миқдордаги пулларни тадбиркор бошқарувидаги МЧЖ ҳисоб рақамига ўтказилиши учун ёрдам беришини айтган. Бунинг учун туман ҳокимининг биринчи ўринбосари розилиги кераклигини билдириб, унга 1000 доллар, ўзига яна 1000 доллар миқдорида пулларни берган тақдирда масалани ҳал қилиб беришини ваъда қилган.
Ҳоким ёрдамчиси Шароф Рашидов тумани, «Юксалиш» маҳалласи ҳудудидаги автомобилларга газ қуйиш шаҳобчаси олдида талаб қилинган 2000 долларни ўзига тегишли Nexia русумли автомашина салонида олган вақтида ашёвий далиллар билан ушланган.
Мазкур ҳолат юзасидан Жиноят кодексининг тегишли моддалари билан жиноят иши қўзғатилган. Ҳозирда тергов ҳаракатлари давом этмоқда.
Мавзуга доир: Қашқадарёда боғча раҳбари 300 доллар пора билан ушланди
Изоҳ (0)