Златан Ибраҳимович Мбаппе ҳақида: Килианнинг Парижда қолгани «ПСЖ» учун яхши, ўзи учун эса ёмон

«Милан» ҳужумчиси Златан Ибраҳимович Килиан Мбаппенинг «ПСЖ»да қолганига муносабат билдирди.

У учун тўғри қарор бўлдими? Йўқ. Париж учун-чи? Ҳа. Париж учун эмас, «ПСЖ» учун.

У «ПСЖ» учун тўғри, лекин ўзи учун хато қарор қабул қилди. Чунки Мбаппе ўзини шундай ҳолатга солдики, натижада клубдан-да муҳимроқ бўлиб қолди. «ПСЖ» эса бунинг учун калитларни берди. Лекин сен клубдан муҳимроқ бўлишинг керак эмас.

Бундай йигит катта бўлса, осонликча пул топиши мумкин. Шу тариқа ота-онаси унинг адвокати, агенти ва мураббийи бўлади. Турмуш даражанг ўзгаради. Ва бу муаммо. Бу вақтда сен интизомингни, ўзлигингни йўқотасан.

Янги авлод ўйинчиларининг ота-оналари ўзларини юлдуз деб ҳисоблай бошлаган. Улар ОАВда чиқиш қилади. Ўзингдан кимни ясаб олдинг? Жим бўл ва жойингни бил. Ўғлингиз меҳнат қилиши ва интизомли бўлиши лозим.

Мен Мбаппени инсон сифатида яхши билмайман. Футболчи сифатида эса у қойилмақом. Интизомни йўқоцанг, ўзингни ҳам йўқотасан.

Зиданнинг Зидан бўлишига сабаб бор. Мбаппе унга тақлид қилмоқчими? У хоҳлайдиган ягона нарса ўсишга эришиш бўлиши лозим.

Златан Ибраҳимович, «Милан» ҳужумчиси

Эслатиб ўтамиз, Килиан Мбаппега «Реал» жиддий қизиқиш билдирганди. Бироқ француз «ПСЖ» билан 2025 йилгача мўлжалланган шартнома имзолади. Футболчининг онаси қуйидагича баёнот берган: «Реал» ва «ПСЖ» билан келишувимиз бор, таклифлар тенг. Фақат Килиан улардан бирини танлаши керак».

Маълумот учун, Мбаппе 2018 йилдан буён «ПСЖ»да ўйнаб келмоқда. Парижликлар унинг трансферига «Монако»дан 180 миллион евро тўлаган.