Тошкентда ИИБ ходимлари ойнасини синдирган Nexia ҳайдовчиси жавобгарликка тортилди
Тошкент шаҳрида 1 ноябрь куни йўл-патруль хизмати ходимлари Nexia-2 машинаси ойнасини уриб синдиргани, қонуний талабларга жавоб бермаган ҳайдовчи қўлга олингани ҳақида хабар берилганди. Тошкент шаҳар судлари фуқарога оид маъмурий ҳуқуқбузарлик тўғрисидаги иш юзасидан маълумот берди.
Иш ҳужжатларига кўра, ҳуқуқбузар 1 ноябрь куни соат тахминан 17:00 лар атрофида ўз бошқарувида бўлган Nexia-2 автомашинасини Юнусобод тумани Шаҳрисабз ва Амир Темур кўчалари кесишган чорраҳада ҳеч қандай ҳужжатларсиз бошқариб кетаётган вақтида ИИО ходимлари томонидан жезл ёрдамида тўхтатилган. Аммо ҳайдовчи тўхташ ишорасига амал қилмай ҳаракатни давом эттириб, воқеа жойидан кетиб қолган. Кўрилган чора-тадбирлар натижасида ҳайдовчи тўхтатилиб, ҳужжатларини текшириш жараёнида, ҳайдовчида автомашина бошқариш учун ҳеч қандай ҳужжатлари мавжуд эмаслиги аниқланган.
Суднинг қарорига кўра, А.Х. Маъмурий жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 2-қисми ҳамда 194-моддаси (ички ишлар органлари ходимининг қонуний талабларини бажармаслик) 1-қисмида назарда тутилган маъмурий ҳуқуқбузарликни содир қилган деб топилган.
Маъмурий жавобгарлик тўғрисидаги кодекснинг 34-моддасига асосан узил-кесил, базавий ҳисоблаш миқдорининг 10 баравари миқдорида жарима жазоси тайинланган.
