Тошкентдаги мактабларда таркибида гиёҳванд моддалар бўлган сақич ва ширинликлар тарқатилаётгани айтилмоқда

Ижтимоий тармоқларда Тошкентдаги 60-сонли ва 110-сонли умумий ўрта таълим мактабларида таркибида гиёҳвандлик моддалари бўлган сақич ва ширинликлар тарқатилаётгани ҳақида аудиохабарлар тарқалди.

Пойтахт ИИББ турли муҳокамаларга сабаб бўлаётган мазкур хабарлар бўйича бош бошқарма масъуллари ушбу мактабларга бориб ўрганиш ўтказгани ва бу каби ҳолатлар қайд этилмаганини маълум қилди.

Қайд этилишича, Тошкент шаҳридаги барча умумтаълим мактабларида вояга етмаганлар масалалари бўйича инспектор-психологлар фаолият юритиб келмоқда. Улар томонидан ўқувчилар ўртасида турли хил салбий ҳолатларни, шунингдек гиёҳвандлик воситалари, психотроп ёки снюс каби моддаларни истеъмол қилинишини олдини олиш мақсадида мунтазам равишда профилактик тадбирлар амалга оширмоқда.