Ўзбекистонда 2022 йил октябрига кўра, бирламчи (янги уйлар) ва иккиламчи (эски уйлар) бозордан уй-жой хариди учун фойдали ипотека кредитлари рейтинги эълон қилинди. Бу ҳақда «Дарё»га «Иқтисодий шарҳ» журналидан маълум бўлди.
Кредит шартлари вилоят ва пойтахт аҳолиси учун сотиб олинадиган уй-жойнинг жойлашган жойи, дастлабки тўлови, ипотека кредити миқдори, шунингдек, фоиз ставкаларига қараб фарқланади.
Марказий банкнинг 2022 йил 9 ойлик статистикасига кўра, банклар томонидан аҳоли учун ажратилган ипотека кредитлар жами 10,3 трлн сўмни ташкил этди.
Янги уйларга ипотека
Натижаларга кўра, Ўзбекистондаги 30 та банкдан 18 та банк ипотека кредити ажратаётгани маълум бўлди.
Қуйидаги банклар ипотека кредитлари тақдим этмайди:
- «Asia алианс банк»;
- «Тибиси банк»;
- «Универсал банк»;
- «Ўзагроэкспортбанк»;
- «Анорбанк»;
- «Мадад Инвест банк»;
- «Савдогар банк»;
- «КДБ банк Ўзбекистон»;
- «Равнақ банк»;
- «Trast банк»;
- «Пойтахт банк»;
- «Тенге банк».
Асосан, юқоридаги кўрсатилган банкларнинг баъзилари ипотека кредитларини вақтинча тўхтатиб қўйган.
Таҳлилда банклар икки гуруҳга бўлинган бўлиб, биринчи гуруҳда бирламчи ва иккиламчи бозорда вилоятга, иккинчи гуруҳда Тошкент шаҳрига ипотека кредитлари масалалари кўриб чиқилган.
Вилоятларда
Таҳлилга кўра, вилоятлардаги бирламчи кўчмас мулк бозорида энг фойдали ипотека кредитларини қуйидаги банклардан «Асакабанк», «Ипотека банк», «Ҳамкор банк», «Халқ банки», «Микрокредитбанк», «Orient Финанс банк», «Ўзсаноатқурилишбанк» ва «Қишлоқ қурилиш банк»дан олиш мумкин бўлади.
Ушбу банклар рейтингда биринчи қатордан жой эгаллаб мижозларга қуйидаги шартларда бирламчи бозордан уй-жой сотиб олиш учун ипотека кредитлари тақдим этмоқда:
- бошланғич тўлов — 15 фоиз;
- йиллик фоиз ставкаси — 17 фоиз;
- муддати — 20 йилгача;
- кредитнинг максимал миқдори 327,25 млн сўмдан ошмаслиги лозим.
Ҳудудларда бирламчи ипотека кредитлари бўйича энг паст кўрсаткични кўрсатган банклар:
- «Ziraat bank»;
- «Ипак йўли банк»;
- «Садерат банк».
Ушбу банкларда дастлабки тўлов 25—30 фоиз, йиллик ставка 25—26 фоиз ва максимал ипотека суммаси 200—800 млн сўм, 60—120 ойгача бўлган муддатга ипотека кредитлари ажратишмоқда.
Маълум бўлишича, ҳудудларда бериладиган 18 турдаги ипотека кредитларидан 12 турдагиси 20 йил муддатга тақдим этилмоқда.
Ипотека кредитлари бўйича катта миқдорни «Капиталбанк» ва «Инфинбанк» ажратиб, тахминан 2 млрд сўм ва 1,9 млрд сўмни ташкил этади. Бироқ, бу банкларда йиллик фоиз ставкалари сезиларли даражада юқори бўлади.
Пойтахтда
Бирламчи бозорга фойдали ипотека кредитларини ажратиш бўйича иккинчи гуруҳда «Асакабанк», «Ҳамкор банк», «Халқ банки», «Микрокредитбанк», «Orient Финанс банк», «Қишлоқ қурилиш банк» ва «Ўзсаноатқурилишбанк» етакчилик қилди.
Ушбу банклар қуйидаги шартлар асосида ипотека кредитларини таклиф этмоқда:
- муддати —20 йилгача;
- максимал миқдори — 416,5 млн сўм;
- йиллик фоиз ставкаси — 17 фоиз;
- бошланғич тўлови — 15 фоизни ташкил этади.
Баъзи банкларида июль ойидаги ипотека кредитлари таҳлилига нисбатан фоиз ставкаларининг -0,5 фоиздан +1 фоизгача ўзгариши кузатилди.
Эски уйларга ипотека
Натижаларга кўра, Ўзбекистондаги 30 та банкдан 13 та банк иккиламчи бозор учун ипотека кредити ажратаётгани маълум бўлди.
Эски уйларга ипотека кредитлари қуйидаги банклар томонидан ажратилмоқда:
- «Инвестфинансбанк»;
- «Халқ банки»;
- «Ziraat bank»;
- «Микрокредитбанк»;
- «Ўзмиллийбанк»;
- «Капиталбанк»;
- «Orient Финанс Банк»;
- «Агробанк»;
- «Давр банк»;
- «Ипотека банк»;
- «Садерат банк»;
- «Ўзсаноатқурилишбанк»;
- «Тенге банк» томонидан ажратилмоқда.
Ушбу гуруҳда «Тенге банк» бошланғич бадали 25 фоиз, йиллик фоиз сатавкаси 24 фоиз ва максимал кредит миқдори 640 млн сўмгача 120 ойга муддатга кредитлар ажратиб рейтингда биринчи ўринни эгалади.
«Микрокредитбанк» рейтингда иккинчи ўринни банд қилиб, «Тенге банк» билан бир хил шартларда иккиламчи бозорга кредит ажратмоқда. Лекин кредитнинг максимал қиймати 1,2 млрд сўмни ташкил этади.
Бундан ташқари, «Ўзмиллийбанк» рейтингда учинчи ўринни эгалаб қўйидаги шартларда ипотека кредитларини иккиламчи бозорга ажратмоқда:
- бошланғич тўлов — 25 фоиз;
- йиллик фоиз сатавкаси — 24 фоиз;
- максимал кредит миқдори — 1 млрд сўм;
- муддати — 120 ой.
Маълумотлар банкларнинг веб-саҳифаларидан олинган бўлиб, кредит шартлари ўзгариши мумкин. Батафсил маълумот учун банкларга мурожаат қилиш керак.
Изоҳ (0)