Санкт-Петербургдаги собиқ Nissan заводи самарадорлигини сақлаб қолиш учун «КамАЗ» орқали Хитой автомобиль ишлаб чиқарувчисини жалб қилиш режалаштирилмоқда. Бу ҳақда манбаларга таяниб «Ведомости» хабар бермоқда.
Кўриб чиқилаётган вариантлардан бири — Хитойнинг First Automobile Works (FAW) давлат концерни билан ҳамкорлик.
«Ведомости»нинг ёзишича, Nissan’нинг Россиядаги активларини олган Саноат ва савдо вазирлигининг Федерал давлат унитар корхонаси ишлаб чиқариш бўйича ҳамкорга эга бўлади.
Бу Санкт-Петербургдаги заводни бошқарадиган Россия компанияси бўлади. Нашр суҳбатдошларидан бири «КамАЗ» бу ҳамкорга айланиши мумкинлигини, бироқ «рақобатчилар ҳам борлигини» айтди. Яна бир манба ҳам «КамАЗ» тегишли таклиф олганини тасдиқлайди.
«Ведомости»нинг иккала манбаси ҳам Nissan заводини юклаш вариантларидан бири сифатида Хитойнинг FAW компанияси билан ҳамкорлик муҳокама қилинаётганини айтди.
Музокаралар қай босқичда ва яна қайси Хитой компаниялари кўриб чиқилаётгани номаълум. Россия Саноат ва савдо вазирлиги ҳозирча бу маълумотга изоҳ бермади.
11 октябрь куни Россия Саноат ва савдо вазирлигининг Федерал унитар корхонаси Nissan’нинг мамлакатдаги активларини сотиб олаётганини маълум қилганди.
Nissan Россия бозорини тарк этишдан кўрган йўқотишлари 686 миллион долларга баҳоланмоқда.
Изоҳ (0)