Тошкентнинг Янгиҳаёт туманида собиқ «Тошиссиққувват» ДУК ҳозирда Veolia Energy Tashkent ХК МЧЖ туман бошқармаси техник инспектори пора олаётганида қўлга тушганди. Хорижий компания матбуот хизмати бунга муносабат билдирди.
Инспектор Б.Ж. фуқаро Ф.нинг хонадонида иссиқ сув истеъмоли учун мавжуд бўлган 6,2 миллион сўм қарздорликни йўқ қилиб бериш эвазига 400 долларни олганда ушланган. Компания ушбу ҳуқуқбузарликни кескин қоралаб, ўзи фаолият юритаётган мамлакатларда амалдаги қонунлар ва қоидаларга амал қилишини маълум қилди.
«Компания расмий вазифаларнинг асосий тамойилларини ифодаловчи Ички меҳнат қоидаларини ишлаб чиқди, шунингдек, яқин келажакда кучга кириши керак бўлган Ишбилармонлик хулқ-атвори ва корпоратив этика тартибини ишлаб чиқмоқда», — дейилади компания муносабатида.
Мазкур ҳолат юзасидан Жиноят кодексининг 168-моддаси (фирибгарлик) ва 28, 192-9-моддаси (тижоратда пора эвазига оғдириб олиш) билан жиноят иши қўзғатилиб, тергов ҳаракатлари ўтказилмоқда.
Изоҳ (0)