«Барселона» учун муаммо эмас, ечим бўлишни истайман. Хави «Эль-Класико» олдидан нималар деди?

«Барселона» бош мураббийи Хави Ла Лига доирасида «Реал»га қарши кечадиган ўйин олдидан ўз фикрлари билан ўртоқлашди.

Ўйин ҳақида

Бу уч очко. Ғалаба биз учун ҳам, «Реал» учун ҳам сув ва ҳаводек зарур. Ким биринчи ўринга чиқишини вақт кўрсатади.

«Реал»га қарши ўйнаш менга ёқади. Мусобақалашишни ёқтираман. Футболчи сифатида ҳам бундай ўйинларда яна қатнашишни хоҳлардим. «Интер»га қарши ўйин ҳақида ҳам шундай дейиш мумкин. Бундай ўйинларда ўз даражангни кўрсатгинг келади. Бироқ мураббий сифатида ҳам ўзингни кучли томонларингни кўрсатишга интиласан.

Мотивация максимал даражада, бу чемпионатда муҳим қадам босишимиз учун имконият. Позицион ҳужум қилишни хоҳлаймиз, «Реал»ни ўз ярим майдонига қамаб қўйиш истагидамиз.

Ғалаба учун ҳар қандай ишга қўл урмоқчи эмасман. Бундай қилиш ярамайди. Мақсад — яхши ўйин билан ғалаба қилиш: юриш биздан бўлсин, прессингда агрессивлик кўрсатайлик. Лекин одамлар натижага эътибор қаратади ва бу табиий ҳол.

«Барселона» лойиҳаси ҳақида

Лойиҳа ҳамон қурилиш жараёнида. Чемпионлар Лигасидаги омадсизлик жаҳлимизни чиқаряпти, бироқ тўғри йўлдамиз. Ла Лигада ажойиб ҳолатдамиз. Еврода ишларимиз у қадар яхши кетмаяпти, аммо лойиҳа ҳали қурилиш босқичида. Ва ҳозир уни бузиб ташлай олмаймиз.

Олдингидек бу лойиҳага позитив ва оптимистик руҳда қарайман. Ишлашда давом этишни истайман, аммо «Барселона» учун ҳеч қачон муаммо бўлмайман, йўқса уйга кетган бўлардим. «Барса» учун ечим бўлишни истайман, шунинг учун бу ердаман. Ҳеч қачон муаммо бўлмайман.

Ўзига нисбатан бўлган танқидлар борасида

Шубҳалар борлигини тушунаман. Қаерда эканимни биламан. Бошқа ҳеч нарса деёлмайман. Биз ютишимиз керак бўлган кунда муваффақиятсизликка учрадик. Афсусдаман. Хафаман. Бироқ тўхтаб қолмаймиз, позитивликни сақлаб қолиш керак.

Вазиятни ўзгартириш учун жамоани қабул қилиб олганимга бир йил бўлмади. Бу ишни қилиш мумкинлигини кўряпман. Ҳозирча хулосалар қилишга эрта. Европада омадсизликка учрадик, бироқ Ла Лигада эмас.

Хоан Лапорта ҳақида

Лапорта менга максимал даражада ишонч берган, олдинда кўплаб мавсумлар бор. У жуда оптимистик кайфиятда, у феномен.

Бу Чемпионлар Лигаси бизга нисбатан жуда шафқатсизлик қилмоқда. Аммо тўғри йўлдамиз, бизда ҳаммаси яхши.

Хави, «Барселона» бош мураббийи

Мавзуга доир: Карло Анчелотти «Эль-Класико» олдидан: «Барселона»нинг ЕЧЛда омади чопмаётгандир, бироқ Ла Лигада жуда кучли