Uzbekistan Airports’нинг Telegram боти тўловларни қабул қилишни бошлади

Uzbekistan Airports халқаро ва ички парвозларни кузатиш учун Telegram бот ишга туширган эди. Энди эса Telegram’даги @UzairportsBot боти Fast Track хизмати учун тўловларни қабул қилишни бошлади. Бу ҳақда компания матбуот хизмати хабар бермоқда.

Fast Track хизмати Тошкент халқаро аэропортидан учаётган йўловчилар учун хизмат туридир. Бу хизмат ёрдамида йўловчилар рейсга рўйхатдан, божхона ва паспорт назорати, шунингдек, парвоз олдидан текширувлардан навбатсиз ўтишлари мумкин.

Telegram бот орқали хизматни харид қилиш учун Тошкент халқаро аэропортини, сўнг жўнаб кетиш терминалини ва керакли рейсни танлаш керак. Кейин бот фамилия ва исмни лотин тилида киритишни «сўрайди». Шундан сўнг хизмат ҳақини Uzcard ёки Humo банк карталари орқали тўлаш мумкин бўлади.

Fast Track хизмати учун тўловни учишдан олдин терминалнинг ўзида миллий валютада ёки Uzcard, Humo, Visa, Mastercard ва бошқалар орқали амалга ошириш мумкин.

Яқин келажакда бот орқали Тошкент аэропорти хизматлари учун тўловларни қабул қилиш функциясини кенгайтириш режалаштирилмоқда.