Самарқандда фирибгарлик билан шуғулланган адвокат ушланди. Бу ҳақида «Дарё»га ДХХ матбуот хизмати маълум қилди.
Таъкидланишича, ДХХ Самарқанд вилояти бўйича бошқармаси томонидан вилоят ИИБ ҳамда прокуратура ходимлари ҳамкорлигида коррупцияга қарши курашиш йўналишида тезкор тадбир ўтказилган.
4 октябрь куни Самарқанд шаҳридаги «Статус» адвокатлик ҳайъати адвокати, 1981 йилда туғилган Ҳ.А. фуқаронинг суд томонидан кўриб чиқилган автомашина олти-сотдиси бўйича фирибгарлик юзасидан қўзғатилган жиноят ишини аппеляция тартибида қайта кўриб чиқилишида ёрдам беришини ваъда қилиб, бунинг эвазига 9 миллион сўм ҳамда мазкур жиноят ишини фуқаронинг фойдасига ҳал қилиш эвазига судьяга бериш учун 3 минг доллар талаб қилган.
Ўтказилган тадбир давомида Ҳ.А. фуқародан 4 минг долларни олаётган вақтда жиноят устида қўлга олинган.
Ҳозирда адвокатга нисбатан Ўзбекистон Республикаси Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Изоҳ (0)