Россия армияси Украина Қуролли кучлари учун оғир қуролларнинг асосий етказиб берувчисига айланди

Уруш бошидан бери Украинанинг Россия армияси чекинишидан қўлга киритган оғир қуроллари Ғарбдан таъминот сифатида олинганлари миқдоридан кўпроқни ташкил этади, деб ёзади «Агенство Новости» Wall Street Journal’га таяниб.

Уруш бошлангандан буён Украина армияси Россиянинг 421 та танкини (Ғарб давлатлари томонидан 320 та танкни ёрдам сифатида юборган), 445 та пиёда жанговар техникаси (Ғарбдан 210 та), 192 та зирҳли жанговар машинаси (Ғарбдан 40 таси) ва 44 та ракета тизимини (Ғарбдан 70) қўлга киритган.

Асл рақамлар бундан ҳам кўпроқ бўлиши мумкин, чунки барча қўлга олинган транспорт воситалари фотосуратлар ва видеоларга тушмайди. Шунингдек, рус қўшинлари Украинада деярли тугайдиган совет стандартидаги катта миқдордаги артиллерия снарядларини қолдирди, дея қайд этади манба.

Таҳлилчиларнинг таъкидлашича, Россия армияси Харьковдан чекинганидан кейин айнан Москва Украинага энг йирик оғир қурол етказиб берувчига айланди. Россия Қўшма Штатлар ва Киевнинг бошқа иттифоқчиларидан анча олдинда, аммо экспертлар таъкидлашича, Ғарб қуроллари одатда анча илғор ва аниқроқ. «Улар қўлга киритаётган нарса жуда самарали ишлатиладиган ва музейга топширилиш ҳолатига келган замонавий жиҳозларнинг аралашмасидир», — деди Oryx таҳлилчиси Якуб Яновский.

Лойиҳада, шунингдек, урушнинг дастлабки кунларида Россия Украинанинг кўплаб қуролларини, жумладан 109 та танк, 15 та ўзиюрар гаубица ва 63 та пиёда жанговар техникасини қўлга киритгани таъкидланган.

Харьков вилоятидаги ҳужум пайтида Украинанинг «Карпатия Сич» батальони 10 та замонавий Т-80 танки ва бешта ўзиюрар Hyacinth гаубицасини қўлга олди, дейди бўлинма бошлиғи ўринбосари Руслан Андреико.

«Бизда шунчалик кўп ўлжалар борки, улар билан нима қилишни ҳам билмаймиз. Биз ҳаракатни пиёдалар баталони сифатида бошлаганмиз ва энди механизациялашган батальонга айланяпмиз», — дейди у.

Харьков фронтидаги бошқа артиллерия баталонининг бошлиғи WSJ’га унинг бўлинмаси ҳозирда қўлга олинган тўртта МСТА ўзиюрар гаубицаларидан фойдаланаётганини айтди.

«Руслар энди отишмада устунликка эга эмаслар», — дейди офицер.

Харьковга юришда Украина армияси энг замонавий рус қуролларини, масалан, Киевда илгари бўлмаган Т-90 танклари ва БТР-82 русумли автомашиналарни ҳам қўлга киритди.

WSJ’нинг қайд этишича, қўлга олинган техниканинг бир қисми дарҳол фойдаланишга тайёр, айрим қуроллар фронтга қайтишдан олдин таъмирланмоқда. Жиддий шикастланган ускуналар қисмларга демонтаж қилинади. Мамлакат Миллий хавфсизлик ва мудофаа кенгаши раҳбари Алексей Даниловнинг таъкидлашича, қўлга олинган оғир техникалар ҳарбий логистика қўмондонлиги орқали тақсимланади, енгил қурол ва ўқ-дорилар эса уларни қўлга киритилган бўлинмаларда қолади.

BBC’нинг ёзишича, сентябрь ойи бошида, урушнинг олтинчи ойи давомида Украина Ғарб давлатларидан 15 миллиард доллардан ортиқ қурол олган. Энг йирик етказиб берувчилар АҚШ (8,79 миллиард), Польша (1,83 миллиард) ва Буюк Британия (1,36 миллиард).