Марғилонлик ота икки нафар фарзанди учун алимент ўрнига Damas олиб берди

Фарғона вилоятининг Марғилон шаҳрида яшовчи фуқаро Т.Э. икки нафар вояга етмаган фарзандининг моддий таъминоти учун ундирилиши белгиланган алимент ўрнига Damas совға қилди.

МИБ Фарғона вилояти бошқармасининг «Дарё»га маълум қилишича, Фуқаролик ишлари бўйича Марғилон туманлараро судининг 2022 йил 21 августдаги ижро ҳужжатига асосан қарздор Т.Э.дан ундирувчи З.Г. фойдасига икки нафар вояга етмаган фарзандининг моддий таъминоти учун алимент ундирилиши белгиланган.

Мазкур ижро ҳужжати бюронинг Қува тумани бўлими томонидан мажбурий ижрога қаратилган ва қарздорнинг Ўзбекистон ҳудудидан четга чиқиш ҳуқуқи вақтинча чекланган.

Ундирувчи З.Г. билан ўзаро келишувга асосан қарздор С.Т. вояга етмаган икки нафар фарзандининг моддий таъминоти учун улар 18 ёшга тўлгунига қадар тўлаши лозим бўлган 127 миллион 262 минг сўм алимент маблағлари ўрнига Damas автомашинаси олиб берган.

Ундирувчининг аризаси билан ушбу ижро ҳужжатининг иш юритуви тамомланган.