Ижтимоий тармоқларда Наманган вилоятининг Чортоқ туманидаги туғуруқхона аҳволининг абгорлиги, уч кишига мўлжалланган палаталарда 13 нафар аёл ётгани тасвирланган видеолар тарқалди. «Дарё» мухбири вазиятни ўрганганда масъуллар мавжуд вазиятдан чиқиш учун туман тиббиёт бирлашмаси гинекология бўлимида қўшимча ўринлар ажратгани, туғуруқхона мудираси ва шифокорлар хоналарида ҳам ҳомиладор аёллар учун жойлар тайёрланганини билдирганди.
Ҳолатга эътибор қаратган Соғлиқни сақлаш вазирлиги вазифасига масъулиятсиз ёндашган туман тиббиёт бирлашмаси раҳбарини ишдан олди.
Соғлиқни сақлаш вазирлиги ишчи гуруҳи томонидан Наманган вилоятида оналар ва болалар саломатлигини таъминлашга масъул тиббиёт муассасалари фаолияти танқидий ўрганилмоқда. Хусусан, дастлабки таҳлилларга кўра, 50 ўринли Чортоқ туман туғуруқ бўлимида шу йилнинг ўтган 9 ойида 3700 нафардан ортиқ ҳомиладор аёл фарзандли бўлган. Муассасада жорий йил сентябрь ойига қадар кунига ўртача 13 та туғуруқ амалга оширилган бўлиб, бу давр оралиғида шифохонанинг ортиқча юклама билан ишлаши деярли кузатилмаган. Бироқ сентябрь ойида кунлик туғилишлар сони ўртача 20 тага ортиб кетгани боис, шифохонада ўрин-жойлар етишмовчилиги юзага келган, — дейилади вазирлик муносабатида.Аммо туман тиббиёт бирлашмаси раҳбарияти томонидан мазкур масалани ҳал этиш бўйича ўз вақтида керакли чора-тадбирлар кўрилмаган. Оқибатда ушбу туғуруқ бўлимидаги палаталарда ўрин-жойлар санитар-эпидемиологик талабларга риоя этилмаган ҳолда жойлаштирилган.
Самарасиз ишлаётган стационар ўринлар ҳисобига ҳомиладор аёллар учун қўшимча ўрин-жойлар яратиш имконияти мавжуд бўла туриб, туман тиббиёт бирлашмаси раҳбарияти мазкур муаммога совуққонлик билан ёндашган. Ана шуларни инобатга олган ҳолда, иш фаолиятида жиддий камчиликларга йўл қўйган Чортоқ туман тиббиёт бирлашмаси раҳбари вазифасини бажарувчи Тоҳир Мўминов эгаллаб турган лавозимидан озод этилди, — дейилади вазирлик ахборотида.Қўшимча қилинишича, юзага келган муаммоли вазиятни тезкор бартараф этиш мақсадида туман тиббиёт бирлашмасидаги самарасиз ишлаётган стационар ўринлар ҳисобидан туғуруқ бўлими учун қўшимча яна 20 та, жами 70 та ўрин-жой ажратилган.
Соғлиқни сақлаш вазири раҳбарлигида ўтказиладиган танқидий йиғилишда юқорида қайд этилган ушбу ҳолат мисолида мамлакатимизда оналар ва болалар саломатлигини муҳофаза қилишга доир муаммоли масалалар ҳамда уларнинг амалий ечимлари муҳокама этилади, — дейилади масъуллар изоҳида.
Изоҳ (0)