Қашқадарё ҳокимлиги делегацияси Бошқирдистон Республикаси ва Нижегород вилоятида бўлиб, вақтинчалик меҳнат фаолиятини амалга ошираётган ватандошлар муаммосини ўрганди. Бу ҳақда «Дарё»га делегация таркибида бўлган вилоят ҳокимлиги ахборот хизмати раҳбари Аҳрор Содиқов хабар берди.
Маълум бўлишича, вилоят ҳокимлиги, вилоят бандлик бошқармаси ва вилоят Касаба уюшмалари масъулларидан иборат делегация Бошқирдистон Республикасида 19—25 сентябрь кунлари ўтказилган халқаро конгрессда иштирок этган.
«Мазкур тадбирни ўтказишдан мақсад — халқлар ўртасидаги маданий ҳамкорлик ва мулоқотнинг барча шаклларини ривожлантириш, маданий ютуқларни ўзаро алмашиш ҳамда туризмни ривожлантиришдан иборат бўлди. Шунингдек, сайёҳларга Ўзбекистоннинг диққатга сазовор жойлари ҳақида маълумот берилди. Қашқадарёдаги туризм ва зиёрат объектлари видео роликлар орқали очиб берилди», — дейди Аҳрор Содиқов.
Ташрифнинг иккинчи кунида Уфа шаҳрида конгресс доирасида «Транспорт ва қурилиш» кўргазмаси ташкил этилган.
«Шундан сўнг танишувлар жараёнида Ўзбекистон Республикасининг Ташқи меҳнат миграцияси агентлиги вакиллари ҳамроҳлигида йирик корхоналар билан мулоқотлар олиб борилди. Жумладан, дунёга машҳур «Меги» компанияси билан тиббиёт анжомларини воҳамизга етказиб бериш, «Ростелеком» билан кўплаб соҳаларга замонавий автоматлаштириш ва робот технологияларни қўллаш, шунингдек, бир нечта корхоналар билан қурилиш соҳасида ҳамкорлик қилиш ва ишчи кучига бўлган эҳтиёжини қондириш орқали икки томонга ҳам фойда келтириш масалалари муҳокама қилинган. Йирик компанияларни вилоятимизга ташрифини амалга ошириш ҳамда воҳамиздаги тегишли масъуллар иштирокида онлайн мулоқотларни ҳам ташкил этишга келишиб олинди.
Қашқадарё делегацияси Уфа шаҳридаги фуқароларимиз учун қатор қулайликлар яратиб келаётган «Кўп тармоқли миграция маркази»да ҳам бўлди. Марказга ташриф давомида ишлаш учун борган фуқароларимиз билан мулоқотлар ташкил этилди, улардан марказдаги шароитлар ва ходимларнинг муносабатлари ўрганилди. Қашқадарё делегацияси вакиллари Россия давлатида меҳнат қилаётган мингга яқин ватандошларимиз учун ўзбекона ош дамлаб тарқатишди. Ишлари туфайли кела олмаган ватандошларимиз учун ҳам ўзбек оши иш жойларига етказилди», — деди Аҳрор Содиқов.
Маълум қилинишича, Ўзбекистон Касаба уюшмалари федерасияси Қашқадарё вилояти Кенгаши раиси Бахтиёр Жўраев ва Бошқирдистон Республикаси Касаба уюшмалари федерасияси раиси ўринбосари Наил Махмутов ўртасида бўлиб ўтган мулоқотда Бошқирдистон ҳудудида шартнома асосида фаолият олиб бораётган ватандошлар оилавий келишган бўлса, уларни турмуш ўртоғи ва фарзандларига ҳам Бошқирдистондаги сиҳатгоҳ ва оромгоҳларга бепул йўлламмаларни беришни тизими йўлга қўйиш масалалари келишиб олинган.
Изоҳ (0)