28 сентябрь куни қабул қилинган Вазирлар Маҳкамасининг 541-сон қарори билан ҳукуматнинг 2014 йил 10 июлдаги 186-сон қарорига ўзгартириш ва қўшимчалар киритилди. Бу ҳақда Давлат хизматлари маркази хабар қилди.
Унга мувофиқ, эндиликда қонунчилик ҳужжатларига мувофиқ аҳоли пунктларининг номланиши ва чегаралари ўзгарганда, шу жумладан бир ҳудуддан бошқа ҳудудга ўтказилганда (турар ёки нотурар кўчмас мулк объектида реконструкция, қўшимча ва алоҳида қурилиш мавжуд бўлган ҳоллар бундан мустасно) давлат хизматлари кўрсатилгани учун йиғимлар ундирилмайди.
Маълумот учун: Олий Мажлис Сенатининг «Тошкент вилоятининг Зангиота, Юқори Чирчиқ, Ўрта Чирчиқ ва Қибрай туманлари ҳамда Тошкент шаҳрининг Сергели, Бектемир, Мирзо Улуғбек ва Яшнобод туманларининг, шунингдек, Тошкент вилояти ва Тошкент шаҳри чегараларини ўзгартириш тўғрисида» 2021 йил 27 августдаги СҚ-379-IV-сон қарори билан Тошкент вилоятининг бир қатор аҳоли пунктлари Тошкент шаҳрига ўтказилган бўлиб, ушбу ҳудудларда яшовчи аҳоли мазкур қулайликдан фойдаланиши мумкин.
Изоҳ (0)