Россия президенти Владимир Путин Украинанинг босиб олинган ҳудудлари ва ўзини ўзи эълон қилган Донбасс республикаларининг «Россия таркибига қўшилиши» ҳақидаги келишувни имзолади, дея хабар берди Meduza.
Россия президенти Владимир Путин ва ўзини ўзи эълон қилган Луганск ва Донецк халқ республикалари, шунингдек, Запорожье ва Херсон вилоятлари ишғол маъмурияти раҳбарлари Кремлда «Россияга қўшилиш» тўғрисидаги битимларни имзолади. Шунингдек, ҳужжатларни мос равишда Леонид Пасечник, Денис Пушилин, Евгений Балицкий ва Владимир Салдолар имзо чекди.
Ҳужжатни имзолаш маросимидан олдин Путин нутқ сўзлаб, хусусан, босиб олинган ҳудудларнинг «уйга қайтаётганини» таъкидлади ва Қўшма Штатлар икки марта ядро қуролини қўллаганини эслатиб ўтди. Ундан ташқари, у Ғарб давлатларининг дунёда тинчлик ўрнатишга бўлган уринишлари фақат ўзларининг фойдасига эканини айтди.
Путиннинг нутқи Россия телеканаллари томонидан жонли эфирда намойиш этилди. Парламентнинг ҳар икки палатаси депутатлари, вилоятлар раҳбарлари, ҳукумат аъзолари ва президент маъмурияти аъзолари йиғилган зал бир неча бор Путиннинг сўзларини гулдурос қарсаклар билан кутиб олди.
«РИА Новости» хабарига кўра, Чеченистон раҳбари Рамзан Қодиров Путиннинг нутқи чоғида йиғлаб юборди.
Изоҳ (0)