«Дарё» нашри 29 сентябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Россия Шимолий Европадаги қўшинларининг 80 фоизини Украинага ўтказган — Foreign Policy
Россия Финляндия ва Болтиқбўйи мамлакатлари билан чегара яқинида жойлашган қўшинларининг 80 фоизини Украинага ўтказган. Бу ҳақда Foreign Policy хабар берди.
Маълумотларга кўра, Москва Шимолий Европадан Украинага бошқа ҳарбий техникалар, жумладан, зенит тизимлари ва ракеталарни олиб ўтмоқда. Аввалроқ Финляндиянинг Елис нашри С-300 ҳаво мудофаа тизими Санкт-Петербургдан Украинага ўтказилиши ҳақида хабар берган эди.
Айни пайтда Россия Финляндия билан чегарада кўчма сафарбарлик пунктини очди, Қозоғистон билан чегарада эса юқори шайлик ҳолатини эълон қилган.
Эслатиб ўтамиз Украинада ҳарбий операция старт олиши биланоқ, Россия ҳарбий комиссариатларига ўт қўйиш бошланганди, етти ой ичида ҳарбий комиссариатлар ва маъмурий биноларга 50 дан ортиқ ҳужумлар амалга оширилди. Медиазона маълумотларига кўра сафарбарлик эълон қилингач, ўт қўйишлар сезиларли даражада кўпайган.
Германия май ойидан буён Украинани разведка маълумотлари билан таъминлаб келмоқда — ОАВ
Шу йилнинг май ойида Германия канцлери Олаф Шольц Украинага нафақат қурол-яроғ, балки разведка маълумотларидан иборат махфий ахборотни тақдим этишни ҳам маъқуллаган. Бу ҳақда Zeit журнали ва ARD Kontraste журналининг қўшма суриштирувида айтилади.
Хабар берилишича, Киевга май ойидан буён сунъий йўлдошдан олинган тасвирлар, «тутиб олинган» радио ва телефон хабарлари узатилиб келинмоқда. Разведка текширувига кўра Германиянинг бу ҳаракатлари урушга қўшилганини билдирмайди ва юридик жиҳатдан халқаро ҳуқуққа мувофиқ келади, деган хулосага келинди.
Апрель ойида АҚШ мудофаа вазири Ллойд Остин биринчи марта Пентагон Украина қуролли кучларига Донбассда жанговар ҳаракатлар олиб бориш учун разведка маълумотларини тақдим этишини тасдиқлаган эди.
Кейинроқ Америка разведкаси Украинани Россия армияси қўмондонлик пунктларининг ҳаракати тўғрисидаги маълумотлар билан таъминлаётгани маълум бўлди. Ушбу разведка маълумотлари Украинага Россия армиясининг штаб-квартирасига зарба йўллашга имкон берган
Кремль эса Ғарбнинг Украинага юбораётган разведка маълумотлари Россиянинг махсус операциядаги мақсадларига эришишига тўсқинлик қилмаслигини билдирди.
АҚШ Меҳнат вазирлиги Ўзбекистон пахтаси ва ундан тайёрланган маҳсулотларга қўйилган чекловлар бекор қилинишини эълон қилди
АҚШ Меҳнат вазирлиги ўзининг TDA Report ҳисоботида 2011 йилдан бери биринчи марта Ўзбекистонни болалар меҳнатининг энг ёмон шаклларига барҳам бериш бўйича «сезиларли тараққиёт»нинг энг яхши тоифасига киритди ва мамлакатда ишлаб чиқарилган пахтани «Болалар ва мажбурий меҳнатдан фойдаланган ҳолда ишлаб чиқарилган маҳсулотлар рўйхати»дан чиқарилишини эълон қилди.
Хабарда айтилишича, ушбу қарор Ўзбекистонда ишлаб чиқарилган пахта ва ундан тайёрланган маҳсулотларни АҚШга олиб киришга қўйилган расмий чекловларни бекор қилади ва шу орқали тўқимачилик маҳсулотларини экспорт қилиш учун янги имкониятлар очади.
Изоҳ (0)