Андижон давлат тиббиёт институти 1955 йилда ташкил этилган бўлиб, бугунги кунда жами 815 нафар профессор-ўқитувчилар талабаларга замонавий тиббий билимларни бериб келмоқда. Ҳозирда муассасада саккизта йўналишида жами 8 минг 253 нафар (шундан 2 минг 761 нафари хотин қизлар) талаба таҳсил олмоқда.
Давлатимиз раҳбарининг 2021 йил 27 январдаги ёшлар бандлиги ва уларнинг ҳордиғини ташкил этишга бағишланган йиғилишда берган топшириқлари ижросини таъминлаш мақсадида институтда ҳам талабалар, айниқса талаба-қизларни турар жой билан таъминлаш борасида бир қатор ишлар амалга оширилмоқда.
Жорий йилнинг 20-сентябр куни Бош вазир Абдулла Арипов раислигида ўтказилган видеоселектор йиғилишида белгиланган вазифалар асосида вилоят ҳокими Шуҳрат Абдураҳмоновнинг берган топшириғига биноан институтда ректор бошчилигида ишчи гуруҳи тузилиб, махсус штаб ташкил қилинди.
Ишчи гуруҳи томонидан ижарада яшаётган ҳар-бир қизнинг яшаш шароити ўрганилиб, яхши шароитга эга бўлмаганларини босқичма-босқич турар жой билан таъминлашга эътибор қаратилмоқда. Бугунга қадар мурожаат қилган ижара хонадонларида истиқомат қилаётган шароити оғир бўлган 13 нафар қизлар белгиланган тартибда Талабалар турар жойига кўчирилиши таъминланди.
Бундан биринчи навбатда узоқ ҳудудлардан келиб 1-босқичда ўқиётган қизларга алоҳида эътибор қаратилмоқда.
Айни пайтда институтга қарашли 1 минг 54 ўринга мўлжалланган талабалар турар жойи 100 фоиз таъминланган бўлиб, унда 538 нафар қизлар истиқомат қилмоқда. Ётоқхонада талабалар учун барча имкониятлар яратилган бўлиб, дарсдан кейинги бўш вақтларини унумли ўтказишлари учун спорт ва касб-ҳунар тўгараклари, Беш ташаббус хоналари, кутубхона туну кун фаолият олиб бормоқда.
Талабаларнинг сони кескин ортиб кетаётганлиги сабабли турар жойга эҳтиёжманд 2 минг 761 нафар қизлар хусусий ётоқхоналарга ва институтга яқин бўлган худудлардаги ижара хонадонларига жойлаштирилган. Жумладан, Андижон шаҳридаги «Чемпион болажон» нодавлат таълим муассасасининг бўш турган биносига ҳамда Андижон туманидаги «Алсаида» хусусий ётоқхонасига 200 нафарга яқин талаба қизлар жойлаштирилган бўлиб, бу ерда уларга нафақат яшаш, балки касб-ҳунар ўрганиш, мунтазам спорт билан шуғулланишлари учун барча шарт шароитлар яратилган.
Ижара хонадонларида яшаш истагини билдирган қизларга ҳам институтга яқин бўлган ҳудудлардаги ижара хонадонлари билан ҳам келишув қилинган бўлиб, мазкур хонадонларда ҳам етарли шароитлар яратилган. Институт раҳбарияти ва тюторлар томонидан доимий равишда қизларнинг ҳолидан хабар олиниб, хонадон эгалари билан суҳбатлар ўтказиб борилмоқда.
Таъкидлаш лозим, ижара хонадонларида истиқомат қилувчи жами 683 нафар талаба-қизларнинг 150 нафардан зиёдига Вазирлар Маҳкамасининг 2021 йил 24 сентябрдаги Қарорига мувофиқ хонадон эгаси билан тузулган шартнома асосида базавий хисоблаш миқдорининг 50 фоизигача бўлган миқдорда ижара ҳақлари қоплаб берилмоқда.
Келгусида қолган қизларга ҳам ижара шартномаларининг бир қисмини тўлаб бериш кўзда тутилган.
Бундан ташқари талабаларни турар жой билан қамраб олиш даражасини ошириш мақсадида қабул қилинган Вазирлар Маҳкамасининг 2021 йил 9 сентябрдаги «Республика олий таълим муассасаларида талабаларни турар жой билан қамраб олиш даражасини ошириш чора-тадбирлари тўғрисида»ги қарори ижросини таъминлаш доирасида ҳам ишлар амалга оширилмоқда. Қарорга асосан институт ҳудудида 2025—2026 ўқув йилига қадар давлат-хусусий шериклик асосида 1600 ўринли 4 та Талабалар турар жойи биносини қуриб битказиш белгиланган.
Айни пайтда ётоқхона ҳудудида 400 ўринга мўлжалланган янги бинони қуриш ишлари олиб борилмоқда. Махсус лойиҳа асосида замонавий меъморий услубда қурилаётган мазкур бинони йил охирига қадар фойдаланишга топшириш назарда тутилган.
Реклама ҳуқуқи асосида.
Изоҳ (0)