Фарғона шаҳрида вояга етмаган шахс бошқарувидаги автомашинадан гиёҳвандлик моддаси топилди. Бу ҳақда вилоят ички ишлар бошқармаси хабар берди.
Маълум бўлишича, 13 сентябрь куни шаҳар ИИБ ЖҚБ ходимлари томонидан тезкор тадбир ўтказилган. Жараён давомида Исмоилова кўчасида ҳаракатланиб келаётган — 2005 йилда туғилган Б.Р.нинг Spark автомашинаси тўхтатилиб, холислар иштирокида кўздан кечирилган. Шунда салонда келгусида ўтказиш мақсадини кўзламай, қонунга хилоф равишда гиёҳвандлик моддасига ўхшаш моддани сақлаб келаётгани аниқланиб, далилий ашё тариқасида олинган.
Мазкур ҳолат юзасидан шаҳар ИИО ФМБ ҳузуридаги тергов бўлими томонидан Жиноят кодексининг 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 1-қисми билан жиноят иши қўзғатилиб, тергов ҳаракатлари олиб борилмоқда.
Жиноят кодексининг 276-моддаси 1-қисмида кўрсатилган жиноятни содир этган шахс 3 йилгача озодликдан маҳрум қилиш билан жазоланиши мумкин.
Изоҳ (0)