Шанхай ҳамкорлик ташкилотига аъзо давлатлар ваколатли органлари ўртасида музей иши соҳасидаги ҳамкорлик тўғрисида меморандум имзоланди. Бу ҳақда Маданий мерос агентлиги хабар бермоқда.
Ўзбекистон томонидан ушбу ҳужжатни имзолашда Туризм ва маданий мерос вазирлиги иштирок этди. ШҲТга аъзо давлатларнинг маданиятлари ўртасидаги тарихий алоқаларни инобатга олган ҳолда музейлар тарихий хотира, бағрикенглик ва маданиятлараро мулоқот қобилиятини шакллантиришнинг энг муҳим институти сифатида кўрилмоқда. Шу боис музей иши соҳасидаги энг яхши анъаналарни сақлашдан умумий манфаатдорлик эълон қилинди.
Меморандумга кўра, аъзо давлатлар томонидан музей ходимларини, шу жумладан, фонд, экспозиция ва кўргазма фаолияти, экскурсия, маданий-маърифий фаолият соҳасидаги мутахассисларни тайёрлаш, қайта тайёрлаш ва уларнинг малакасини оширишда ҳамкорлик йўлга қўйилади. Шунингдек, музей ва музей ашёларини реставрация ҳамда консервация қилиш бўйича тажриба алмашиниб, музейлараро амалиётлар, асосий йўналишлар бўйича маҳорат дарслари ташкил қилинади.
ШҲТга аъзо давлатларнинг етакчи музей марказлари ва таълим муассасаларида масофавий таълимни ташкил этиш учун шарт-шароит ва техник имкониятлар яратилади.
Изоҳ (0)