Қашқадарёнинг Қамаши туманида жарима майдончасига қўйилган Nexia ёниб кетди.
Машина эгаси Э.Б.нинг маълум қилишича, 6 август куни ЙПХ инспектори томонидан қарздорлик учун автомашина тўхтатилиб, туман марказидаги жарима майдонига жойлаштирилган. Орадан бир неча соат ўтгандан кейин автомашинада ёнғин чиқиб, ёниб кетган.
«Жарима майдонига борсам, машинадан асар ҳам йўқ. Ёниб, кул бўлган. Сабаби эса аниқ эмас. Metaн баллондан бўлган десам, метан баллонга ҳеч нарса қилмаган. Машинанинг техник ҳолати соз эди. Ўз-ўзидан ёниб кетиши мумкин эмас», — деган ҳайдовчи.
Вилоят ИИБ матбуот хизмати хабарида айтилишича, ҳодиса жойига туман ФВБ ходимлари чиқиб, ҳолатни ўрганганда, ёнғин автомашинанинг олд капот қисмидан келиб чиққанини кўрсатилган.
Қамаши туман ИИБ Навбатчилик қисмига 6 август куни соат 13:30 ларда келиб тушган хабарга кўра, туманнинг «Қовчин» МФЙда жойлашган «Техника тўплам» МЧЖ ҳовлисида Э.Б.га тегишли Nexia турган жойида ёниб кетгани маълум қилинган.
Шу сабабли ёнғин ўчоғини аниқлаш мақсадида 8 август куни ёнғин содир бўлган жойдан олинган электр сими ва кул намунлари Адлия вазирлиги қошидаги Ҳадича Сулаймонова номидаги суд-экспертиза марказига экспертизадан ўтказиш учун юборилган.
Суд экспертиза марказининг хулосасида ҳодиса содир бўлган жойдан олинган ёнғин қолдиқларида нефть махсулотлари ва тез ёнувчи суюқликлар излари мавжуд эмаслиги кўрсатиб ўтилган.
Шу сабабли машина қасддан ёқиб юбориш ҳолатлари аниқланмагани сабабли етказилган зарарни ундириш бўйича фуқаро Э.Б.га суғурта ташкилотига мурожаат қилиши ва «Техника тўплам» МЧЖ билан боғлиқ ҳаракатлари фуқаролик муносабатлари эканлигини инобатга олиб, Фуқаролик ишлари бўйича судга мурожаат қилиши тушунтирилган.
Изоҳ (0)