Катта адрон коллайдери энергия инқирози туфайли муддатидан икки ҳафта олдин тўхтатилади

Европа ядро тадқиқотлари маркази (CERN) Катта адрон коллайдерини режали тўхтатишни ўз муддатидан икки ҳафта аввал амалга оширишга қарор қилди, деб ёзади Meduza марказнинг ички ҳужжатига таяниб.

«Шу йил қишда кутиладиган энергия инқирозига жавобан, CERN дирекцияси ҳар йилги анъанавий техник тўхташ бошланишини икки ҳафта олдинга суришга қарор қилди», — дейилади ҳужжатда.

Ҳужжатга мувофиқ, энди CERN тезлатувчини 28 ноябрь куни эрталаб тўхтатади. 2022 йил бошида тақдим этилган Катта адрон коллайдерига хизмат кўрсатиш графиги бўйича дастлаб CERN режали тўхташни декабрга белгилаган.

Коллайдерни режали ўчириш камида йилига бир марта амалга оширилади, одатда у қиш ойларига тўғри келади, шимолий ярим шарда энергия истеъмолининг авж нуқтаси одатда шу пайтда кузатилади.

Аввалроқ CERN энергия тармоғига юкламалар авжига чиққан пайтда зарраларни тезлатувчиларнинг баъзиларини ўчириб қўйиш бўйича режани ишлаб чиқаётгани хабар берилганди. CERN, шунингдек, зарурият юзага келса, Катта адрон коллайдерининг ишини тўхтатиш имкониятини ҳам кўриб чиқаётганди. 4,4 миллиард долларлик дунёдаги энг катта зарраларни тезлатувчи — Катта адрон коллайдери CERN’нинг саккизта тезлатувчиларидан биридир.

Франция-Швейцария чегарасида жойлашган CERN — Франциядаги энг йирик электр энергияси истеъмолчиларидан бири. Авж нуқтада марказ қарийб 200 МВт истеъмол қилади, бу энг яқиндаги шаҳар — Швейцариянинг Женевасидагидан уч марта кўпроқ демакдир.

Катта адрон коллайдери — дунёдаги энг кучли зарра тезлатувчи. Коллайдер зарраларни ёруғлик тезлигига яқин кўрсаткичларгача тезлатади ва улар бир-бири билан тўқнашади. Унинг ёрдамида олимлар 2012 йилда Хиггс бозонини аниқлаган. 2018 йил декабрида коллайдер таъмирлаш учун тўхтатиб қўйилганди. Шу йилнинг июлида у қайтадан ишга туширилди.