Эрон Ислом республикасининг Шанхай Ҳамкорлик Ташкилотига аъзо давлат мақомини олиш учун мажбуриятлари тўғрисидаги меморандум имзоланди.
Хусусан, ШҲТ бош котиби Чжан Минг 15 сентябрни Эрон учун ҳам, ташкилот учун ҳам муҳим кун дея таъкидлади. Эроннинг иштирокчи давлатлар гуруҳига кириши Шанхай ҳамкорлик ташкилотини мустаҳкамлайди. Меморандумда кўзда тутилган барча мажбуриятлар бажарилгач, Эрон Ислом республикаси ШҲТнинг тўлақонли аъзосига айланади.
Эрон ШҲТга қачон тўлақонли аъзо бўлади?
Ўзбекистоннинг ШҲТ бўйича миллий координатори Раҳматулла Нуримбетов ушбу саволга жавоб берди:«2005 йилда Эрон ШҲТда кузатувчи давлатга айланди. Мамлакатнинг ташкилотга тўлақонли аъзолигига кириш жараёни 2021 йилда бошланган.
ШҲТнинг Самарқанд саммитида эса Эрон Ислом Республикасининг Ташкилотга аъзо давлат мақомини олиш мажбуриятлари тўғрисидаги меморандум имзоланди.
Бу Эроннинг Ташкилотга тўлақонли аъзо бўлишини англатмайди. Гап шундаки, бугун имзоланган меморандумга кўра, расмий Теҳрон Ташкилот хартиясидан келиб чиқиб тегишли мажбуриятларни бажариши ва қатор ҳужжатларни ратификация қилиши керак бўлади.
Бу вазифалар тўлиқ бажарилгандан кейин Эрон тўлақонли аъзо сифатида қабул қилинади», – таъкидлади миллий координатор.
Эрон Ислом Республикаси ШҲТга аъзо бўлиш ҳаракатида
Республика майдони бўйича дунёда 17-ўринни эгаллайди; аҳолиси — 85,5 миллион нафарга яқин.
Эроннинг дунёдаги обрўси йил сайин ортиб бормоқда. Аввало, бу унинг ўтган асрнинг энг муҳим стратегик манбасига айланган ва ҳозирги даврда аҳамияти ошган углеводородларни глобал ишлаб чиқаришдаги роли билан боғлиқ. British Petroleum маълумотларига кўра, Эрон табиий газ захиралари бўйича дунёда 2-ўринда (Россиядан кейин), тасдиқланган нефть захиралари бўйича 4-ўринда ва уни ишлаб чиқариш бўйича 7-ўринда туради.
Бугунги кунга келиб Эрон дунёнинг кўплаб мамлакатлари билан алоқалар ўрнатган. Шу билан бирга, унинг ташқи сиёсатида Марказий Осиё йўналиши асосий йўналишлардан бири ҳисобланади.
Таҳлилчиларнинг таъкидлашича, Эроннинг ШҲТ фаолиятида тўлиқ иштирок этиши ташкилот Хартияси мақсадларига тўлиқ мос келади, ушбу макроминтақавий бирлашманинг барча иштирокчилари манфаатларига жавоб беради ва ўзаро манфаатли ҳамкорликка катта туртки беради.
#SCO2022Самарканд
Изоҳ (0)