Лондон фонд биржаси 19 сентябрь, қиролича Елизавета II дафн маросими бўладиган куни ишламайди. Бу ҳақда биржа расмий сайти хабар бермоқда.
Бу кун Буюк Британияда дам олиш куни деб эълон қилинган.
Лондон металл биржаси ҳозирча расмий баёнотлар бермади, бироқ Bloomberg манбалари сайт 19 сентябрь куни савдо қилишни режалаштираётгани ҳақида хабар берди.
Манбаларга кўра, бу позиция брокерлар ва мижозларнинг норозилигига сабаб бўлади — баъзилар дафн куни савдоларни очиш ҳурматсизлик, деб ҳисобламоқда.
19 сентябрь куни Лондонда Елизавета II нинг дафн маросимида дунёнинг турли давлатларидан 500 га яқин юқори мартабали меҳмонлар иштирок этиши кутилмоқда.
Шу муносабат билан Буюк Британия дипломатик алоқаларни ўрнатган аксарият давлат раҳбарларига таклифномалар юборди. АҚШ, Канада, Австралия, Янги Зеландия ва бошқа кўплаб давлатлар раҳбарлари маросимда иштирок этишларини тасдиқлади.
ОАВ Елизавета II билан бўлиб ўтадиган видолашув маросимини сўнгги ўн йилликдаги энг йирик дипломатик йиғин деб атамоқда.
Аввалроқ Лондон фонд биржаси қиролича Елизавета II вафотидан сўнг савдоларни тўхтатган эди. Кейинчалик 9 сентябрь биржа яна қайта очилган ва савдолар давом этган.
Изоҳ (0)