Ўзбекистонда инфляцион хатарлар сақланиб қолмоқда — Марказий банк
Ўзбекистон истеъмол бозорларида талаб ва таклифга таъсир кўрсатувчи ички ва ташқи иқтисодий омиллар ҳисобига нархларга бўлган босим юқорилигича қолмоқда. Бу ҳақда Марказий банк хабар бермоқда.
Август ойида йиллик инфляция суръати 12,3 фоизни ташкил этди. Июль ойида 0,1 фоизлик дефляция қайд этилганди.
Йиллик инфляция таркибида озиқ-овқат маҳсулотлари нархлари 16,3 фоизга ошган бўлса, ноозиқ-овқат товарлари ва хизматлар мос равишда 10,9 ва 7,1 фоизга қимматлашди.
Август ойи натижаларига кўра, аҳолининг келгуси 12 ой учун инфляцион кутилмалари 15,3 фоизгача, тадбиркорларнинг кутилмалари – 14,1 фоизгача пасайган бўлса-да, жорий инфляция суръатларига нисбатан юқорилигича қолмоқда.
Шунингдек, жорий йил давомида шаклланган базавий инфляциянинг ўсувчи тренди ҳам иқтисодиётда инфляцион хатарлар сақланиб қолаётганини кўрсатмоқда.
Йиллик базавий инфляция августда 12,4 фоизни ташкил этиб, унинг умумий инфляциядаги ҳиссаси 9,4 фоиз бандгача ошди.
Аввалроқ Ўзбекистонда асосий ставка 15 фоиз даражасида ўзгаришсиз қолдирилгани ҳақида хабар берилганди.
